د. زێدان برادۆستی: قانوونا خانیێن زێدەگاڤی دێ ھێتە راستڤەکرن

ئاژانسا خانی ، تایبەت:

لژنا باژێڕڤانیان دێ داخوازەکێ ئاراستەیی سەرۆکاتییا پەرلەمانێ کوردستانێ کەت ب مەرەما راستڤەکرنا قانوونا خانیێن زێدەگاڤی و ئەندامەکێ لژنێ ژی دبێژیت، ژڤانێ تۆمارکرنا مامەلێن خانیێن زێدەگاڤی ب دووماھی ھاتییە و ھژمارەکا زۆرا وەلاتییان نەشیاینە مامەلێن خوە تۆمار بکەن.

د. زێدان برادۆستی، ئەندامێ لژنا باژێڕڤانییان ل پەرلەمانێ کوردستانێ بۆ ئاژانسا خانی دیار کر:” ھەرسێ جڤاتێن پارێزگەھێن ھەرێما کوردستانێ داخوازەک ئاراستەیی لژنا باژێڕڤانیان کرییە و تێدا داخوازا درێژکرنا دەمێ پێشکێش کرنا مامەلێن خانی یێن زێدەگاڤی دکەن، لژنا باژێڕڤانیان ژی دێ ھەمان داخوازێ پێشکێشی دەستەیا سەرۆکاتییا پەرلەمانی کەت ب مەرەما پێداچوونێ ب بڕیارا تاپۆکرنا خانی یێن زێدەگاڤی.

ناڤهاتی گۆت ژی” ئەم دێ کار کەین بۆ راستڤەکرنا قانوونا تاپۆکرنا خانیێن زێدەگاڤی، چونکی ھژمارەکا زۆرا وەلاتییان ھەتا دووماھی ژڤان مامەلێن خوە پێشکەش نەکرینە، ئەڤە ژی دبیتە ئەگەر ھژمارەکا زۆرا وەلاتی یێن خودانێن خانی یێن زێدەگاڤی بێ بەھر بن ژ قانوونا تاپۆکرنا خانیێن زێدەگاڤی، لەوما دێ ھەموو بزاڤان کەین بۆ راستڤەکرنا قانوونا خانیێن زێدەگاڤی د بەرژەوەندیا وەلاتیێن ھەرێما کوردستانێ دا.