وەزیرێ کاروبارێن شەهید و ئەنفالکرییان و سەرۆکێ دەزگەهێ زیندانییێن سیاسی یێ عێراقێ د کۆنگرەکێ رۆژنامەڤانی دا، ڕێککەفتنا خۆ بۆ کاراکرنا لژنا هەڤپشک و گەهاندنا دۆسەیا زیندانییێن سیاسی یێن هەرێمێ بۆ سەر حکومەتا فیدرالی ڕاگەهاند، تەكەزی ل سەر قەرەبووکرنا ماددی و مەعنەوی یا وان هاتە کرن.
ئەڤرۆ سێشەمبی، عەبدوللا حاجی مەحموود، وەزیرێ کاروبارێن شەهید و ئەنفالکرییان، د کۆنگرەکێ رۆژنامەڤانی یێ هەڤپشک دا ل گەل د. وەلید سەهلانی، سەرۆکێ دەزگەهێ زیندانییێن سیاسی یێ فیدرالی ڕاگەهاند: ئەم ڕێککەفتینە ل سەر وێ چەندێ کو ئەو لژنا د ناڤبەرا هەردو ئالییان دا پێکهاتییە، کار ل سەر بهێتە کرن و فەرمانا کارکرنێ ژ لایێ سەرۆکێ دەزگەهێ زیندانییێن سیاسی یێ عێراقێ ڤە بۆ بهێتە دەرخستن و دۆسیەیا زیندانییێن سیاسی یێن هەرێما کوردستانێ دێ هێتە ڤەگوهاستن بۆ سەر حكومەتا عێراقێ ڤە.
