هیوا ئەحمەد مستەفا: تەعریب یا بەردەوامە و کوردان پرانییا پۆستێن بلند ل كەركووكێ ژ دەستداینە

هیوا ئەحمەد مستەفا: تەعریب یا بەردەوامە و کوردان پرانییا پۆستێن بلند ل كەركووكێ ژ دەستداینە

بەرپرسێ مەکتەبا ڕێکخستنا کەرکووک – گەرمیان یا پارتى دبێژیت: پێگەهێ کارگێڕیا کوردی ل کەرکووکێ بەرەف لاوازییێ ڤەچوویە و پرانییا پۆستێن بلند ژ لایێ پێکهاتێ عەرەبڤە هاتینە کۆنترۆلکرن، ب گرنگ ژی دزانیت ئەڤ نەهەڤسەنگییە د هەڤکێشەیا رێڤەبەرنێ دا بهێتە راستڤەکرن.
هیوا ئەحمەد مستەفا، بەرپرسێ مەکتەبا ڕێکخستنا کەرکووک – گەرمیان یا پارتی دیموکراتی کوردستان ڕاگەهاند، پرۆسا گوهۆڕینا دیمۆگرافی و تەعریبێ هێشتا یا بەردەوامە، ب رەنگەكی كو نوكە ژی سوپا ڕێگرییێ ل جۆتیارێن کورد دکەت زەڤییێن خۆ بکێلن.
ناڤهاتی گۆت ژی: ل سەردەمێ دەستهەلاتا ڕاکان جبوری، پارێزگارێ پێشتر یێ كەركووكێ، 72 هزار عەرەبێن ژ دەرڤە هاتینە کەرکووکێ، ئەڤە ژی بەرۆڤاژی ڕێکارێن ماددێ 140 و ب ئارمانجا گوهۆڕینا سیمایێ نەتەوەیی یێ باژێری هاتییە ئەنجامدان.