سیپان شێروانی: ئۆپۆزسیۆنێ ئیمزا بۆ چارەسەرییا کێشا بەنزینێ نەكر

سیپان شێروانی: ئۆپۆزسیۆنێ ئیمزا بۆ چارەسەرییا کێشا بەنزینێ نەكر

ب مەرەما ڤەدیتنێ بۆ چارەسەرییا کێشەیا سووتەمەنیێ ل هەرێما کوردستانێ، پتر ژ 166 پەرلەمانتارێن عێراقێ ئیمزا کۆمکرینە، بەلێ پەرلەمانتارێن ئۆپۆزسیۆنا کوردی ئامادە نەبوون ئیمزایێ بۆ وێ پشتگیرییێ بکەن.
سیپان شێروانی، ئەندامێ لژنا نەفت و گازێ ل پەرلەمانێ عێراقێ کو خودانێ دەستپێشخەریێ یە بۆ هەوا کۆمکرنا ئیمزایان دیار كر: هەتا نوكە پتری 166 ئیمزا هاتینە کۆمکرن، ئارمانجا ڤێ پێنگاڤێ ئەوە فشاران بێخینەسەر عەلی زەیدی داکو چارەسەریەكا بلەز بۆ کێشەیا سووتەمەنیێ ب تایبەت بەنزینێ ل هەرێما کوردستانێ ب بینیت، بهێتە سەر خەت و بڕیارێن پێدڤی بدەت.
سیپان شێروانی گۆت ژی: ئەو ئیمزایێن هاتینە کۆمکرن یێن پەرلەمانتارێن پارتى و ئێكەتییێ و پەرلەمانتارێن عەرەبن، بەلێ پەرلەمانتارێن ئۆپۆزسیۆنا کوردستانێ (نەوەی نوێ، ئێکگرتوو و کۆمەل) چ ژ وان ئامادە نەبوون ئیمزایێ ل سەر وێ داخوازیێ بکەن، هەروەسا جهێ سەرنجێ یە پەرلەمانتارێن عەرەب نیگەرانن ژ رەوشا وەلاتییێن هەرێما کوردستانێ و وان ئیمزا کرینە، بەلێ پەرلەمانتارێن ئۆپۆزسیۆنا مە خۆ ئامادە نینن وەک ئەو پەرلەمانتارێن عەرەب ئیمزایەكی بکەن بۆ وێ چەندێ کێشەیا وەلاتییان چارەسەر ببیت.
ناڤهاتی گۆت ژی: ل راگەهاندنێن وان دا ئەم دبینین زۆربەیا پەرلەمانتارێن ئۆپۆزسیۆنێ رەخنێ ل حکومەتا هەرێمێ دگرن لسەر بابەتێ بەنزینێ، بەلێ د ئامادە نینن ئیمزایەکی بکەن بۆ چارەسەرکرنا وێ کێشەیێ، د دەمەکی دا ئیمزایا وان ب تنێ بۆ پشتەڤانیێ یە نەکو بڕیاردانێ.
سیپان شێروانی دبێژیت ژی: د نڤیسارێ دا ب شێوازەکی یاسایی مە داخواز کریە، پشکا هەرێما کوردستانێ ژ بەنزینا پارزینگەهان یان نەفتا خاڤ دابین بكەن، ئەڤە ژی لسەر بنەمایێ دەقێن دەستووری و لدووڤ رێژا ئاكنجیێن هەرێمێ یە.