<h2>وەزارەتا دەرڤە یا ئیرانێ ڕاگەهاند، تەهرانێ و واشنتۆنێ ڕەشنڤیسەك بۆ ڕاگرتنا شەڕی ئامادە كریە، دۆنالد ترەمپی ژی ئاشكراكر، ئەو دنێزیكن وێ ڕەشنڤیسێ ئیمزا بكەن.</h2> <h2> ئیسماعیل بەقایی، پەیڤدارێ وەزارەتا دەرڤە یا ئیرانێ د دیدراەكێدا كو ژلایێ ئاژانسا (ئیرنا)ڤە هاتییە بەلاڤكر، ڕاگەهاند، لێكگۆهارتنا نامەیان دناڤبەرا ئیران و ئەمریكادا یا بەردەوامە، پاكستان وەكو تەوەرێ ناڤەندێ دانوستاندنان ڕۆلێ سەرەكی دگێریت.</h2> <h2> ئاشكرا ژی كر، ڕەشنڤیسەكا 14 خالی دناڤبەرا هەردوو لایاندا هاتییە ئامادەكرن، كو تەوەرێن وێ یێن سەرەكی پێكهاتینە ژ، ڕاگرتنا شەڕی دهەموو بەرەیاندا ب تایبەتی ( لبنان )، ب دووماهی ئینانا ب دوورپێچا دەرییایی یا ئەمریكا و ئازادكرنا پارەیێ بلۆككری یێ ئیرانێ.</h2> <h2> سەبارەت چەكێ ئەتۆمی دیاركر، دڤێ قووناغێدا ئەو چ دانوستاندنان ل سەر كەیسا ئەتۆمی ناكەن، ئەولەوییەتا وان ڕاگرتنا هێرشایە، كەیسا ئەتۆمی بهانەیەكە بۆ شەڕی، لێ نوكە ئەو بەحس ناكەن هەتا لێكتێگەهشتن دهێتە ئیمزاكرن.</h2> <h2> ل دۆر تەنگا هورمزێ ئاماژە ب هندێ دا، ئەوێ دەڤەرێ پەیوەندی ب ئەمریكاڤە نینە، ب تنێ ئیران و عومان وەكو دوو دەولتێن كەناری ژێ بەرپرسن، نەئارامییا نوكی ل وی تەنگە، ژ ئەگەرێ ڕەفتارێن توند ڕەو یێن ئەمریكا و ئیسرائیلێنە.</h2> <h2> ژلایێ خۆڤە دۆنالد ترەمپ، سەرۆكێ ئەمریكا د دیدارەكێدا دگەل كەنالێ (CBS) یێ ئەمریكی ئاشكراكر، دانوستاندنێن وان دێ گەهنە ئەنجامی، گەلەك د نێزیكن شەڕی ب دووماهی بینن.</h2>
