ئەڤرۆ سێشەمبی 10ـی ئادارا 2026، سەرۆك مەسعود بارزانی پێشوازی ل مامۆستا سەلاحەددین بەهائەدین، ئەمیندارێ گشتییێ ئێكگرتوویا ئیسلامیا كوردستانێ كر.
د دیدارەكێ دا، مامۆستا سەلاحەددین بەهائەدین دگەل ئاماژەدانێ ب رەوشا دەڤەرێ، تەكەزی ل سەر وێ چەندێ كر كو زێدەباری هەبوونا جوداهییا دیتنێن سیاسی د ناڤبەرا لایەنان دا، ڕەوشا نوكە دخوازیت كو دڤێت گوهۆڕینا بۆچوون و هەماهەنگیەکا بەردەوام د ناڤبەرا هێزێن سیاسی دا ل سەر بابەتێن هەستیار هەبیت.
هەروەسا سوپاسیا ڕۆلێ سەرۆك بارزانی كر بۆ وێ خەمخۆری و ب دەنگەڤەهاتن و بزاڤێن وی یێن بەردەوام بۆ پاراستنا گەلێ كورد ل ڕۆژئاڤا و ئەو ڕۆلێ كاریگەر یێ وی د پرۆسەیا ئاشتیێ دا ل توركیا دیتی.
سەرۆك بارزانی ئەڤ چەندە دوپاتكر كو ژبەر بەرژەوەندیێن بلند و هەستیارییا قووناغێ، پێدڤییە لایەنێن سیاسی هەماهەنگی و گۆتوبێژێن زێدەتر هەبن، دیار کر یا گرنگە هەموو لایەن لەزێ بکەن بۆ كاراكرنا پەرلەمانی و پێكئینانا حكومەتەکا بنكەفراوان یا نیشتیمانی، كو تێدا هەموو لایەن بەرپرسیاریەتیێ هەلگرن.
دەربارەیی بابەتی پێكئینانا جڤاتا سیاسی ژی، سەرۆک بارزانی ب پێدڤی زانی كو هەموو پارتێن سیاسی تێدا پشكدار بن، ب مەرجەکێ ئەڤ جڤاتە نەبیتە ئەلتەرناتیڤا دامەزراوەیێن فەرمی یێن هەرێما كوردستانێ.
