فوئاد حسێن: بەردەوامبوونا شەری دێ كاریگەرییا نەرێنی ل سەر ئابۆرێ جیهانێ هەبیت

وەزیرێ دەرڤە یێ عێراقێ ڕاگەهاند كو بەردەوامبوونا شەری دێ بیتە ئەگەرێ قەیرانا وزێ و بلندبوونا بهایان، كو ئەڤە ژی دێ زیانێ گەهینیتە ئابۆرێ دەڤەرێ و هەمی جیهانێ.
ئەڤرۆ چارشەمبی، ٤ی ئادارا ٢٠٢٦، فوئاد حسێن دگەل “سێرگی لاڤرۆڤ” وەزیرێ دەرڤە یێ ڕووسیا بەحسێ ڕەوشا سیاسی و ئابۆرییا دەڤەرێ كر.
لاڤرۆڤی دیار كر: ئەو دگەل وەزیرێن دەرڤە یێن وەلاتێن كەنداڤی و ئیرانێ ئاخڤتییە و تەكەزی ل سەر وێ چەندێ كرییە كو باشترین رێك بۆ چارەسەرییێ دانوستاندن و دبلۆماسییە.
فوئاد حسێن دوپاتكر: د ڤێ قووناغا هەستییار دا، گەلەک گرنگە هەماهەنگی و شیرەتكاری د ناڤبەرا عێراق و ڕووسیا دا یا بەردەوام بیت.
وەزیرێ دەرڤە زێدەتر گۆت: عێراق ئێكە ژ وان وەڵاتێن كو ژبەر ڤان ململانان ب شێوەکێ راستەوخۆ زیان گەهشتییێ، چونکی ڕووبروو هێرشێن هەردو لایان دبیت، ئەڤ چەندە بوویە ئەگەر کو عێراق ببیتە قوربانی نەک پشکەک ژ شەڕی.