فەرهاد ئەتروشی، جێگرێ سەرۆکێ پەرلەمانێ عیراقێ تەكەزی ل سەر گرنگیا هەموارکرنا یاسایا قەرەبوکرنا زیان ڤێکەفتییان و مسۆگەرکرنا مافێن کەسوکارێن شەهیدان ل سەرانسەری عیراق و هەرێما کوردستانێ کر.
ئەڤڕۆ سێشەمبی، 20ـی کانوونا دووێ 2026 ێ، نڤێسینگەها ڕاگەهاندنا جێگرێ سەرۆکێ پەرلەمانی ئاشکرا کر، فەرهاد ئەترۆشی ل نڤێسینگەها خۆ یا تایبەت ل بەغدا، پێشوازی ل عەبدولئیلاهـ نائیلی، سەرۆکێ دەزگایێ شەهیدێن حکومەتا فیدرالی کر.
د دیدارێ دا سەرۆکێ دەزگایێ شەهیدان پیرۆزباهیێن خۆ ئاراستەیی فەرهاد ئەترۆشی کرن ب هەلکەفتا هەلبژارتنا وی وەکی جێگرێ سەرۆکێ پەرلەمانی.
هەردو لایەنان گەنگەشە ل سەر ب هێزکرنا هەماهەنگیان و پرسا هەموارکرنا یاسایا قەرەبوکرنا وان کەسان کر یێن کو ژبەر کریارێن تیرۆرستی و شاشیێن سەربازی زیان گەهشتییێ.
فەرهاد ئەتروشی دەستخۆشی ل بزاڤێن دەزگایێ شەهیدان کر و دوپاتکر ل سەر گرنگیا بەردەوامبوونا کاران بۆ خزمەتکرنا خێزان و کەسوکارێن شەهیدان و زامنکرنا مافێن وان ل هەمی پارێزگەهێن عیراقێ و هەرێما کوردستانێ بێی چ جوداهی.
