دەقێ پەیاما سەرۆكێ هەرێما كوردستانێ:
ئەڤرۆ د یادا 38 سالییا كيميابارانكرنا باليسان و شێخ وه‌سانان و دۆلا خۆشناوه‌تيدا، سه‌رێ ڕێز و نه‌وازەشێ بۆ گيانێ پاك یێ شه‌هيدێن وێ تاوانا ڕژێما پێشوو دچەمینین، ب ڕێزڤە وان ل بیرا خۆ دئینین و سلاڤ و رێزان بۆ خێزان و كه‌سوكارێن وان یێن سه‌ربلند دهنێرین.
تاوانا كيميابارانكرنا وێ دەڤەرێ و خەلكێ وێ یێ دلسۆز و تێكۆشه‌ر، به‌رده‌واميیا زنجيره‌يه‌كا تاوانێن دی بوو ده‌رحه‌ق ب خه‌لكێ سڤيل و ئاخ و سروشتێ كوردستانێ، مەرەم ژێ شكاندنا ئيرادا ئازاديیا گه‌لێ كوردستانێ و خه‌لكێ نشتیمانپه‌روه‌رێ وێ دەڤەرێ بوو كو هەردەم بارەگایەكێ گرنگ یێ خه‌بات و تێكۆشانێ و مە‌لبه‌ندێ پێشمه‌رگايه‌تییێ بوویە.
ئازادى و ده‌ستكەفتێن ئەڤرۆ یێن هه‌رێما كوردستانێ، به‌رهه‌مێ خوین و خه‌بات و قۆربانيدانا خەلكێ كوردستانێیە. باشترين ياد و ڕێز و وه‌فا بۆ گيانێ شه‌هيدان و مسۆگه‌ركرنا پاشەڕۆژەكا باشتر بۆ گه‌لێ كوردستانێ، ئێكڕێزی و ته‌بايى و پێكڤه‌‌يى و خزمه‌تكرنا زێدەتر یا كوردستانێیه.
