شیرەتكارەكێ سوودانی: رێیا گەشەپێدانێ دێ ل پارێزگەها دهۆکێ را دەربازبیت

شیرەتكارەكێ سەرۆکوەزیرێن عێراقێ بۆ ڤەگوهاستنێ راگەهاند، رێیا گەشەپێدانێ ب درێژاهییا 11 کیلۆمەتران دێ ل پارێزگەها دهۆکێ دا دەربازبیت و ل رێیا پێشابیرێ دێ چیتە ناڤ ئاخا تورکیا.

د. ناسر ئەسەدی، نەخشەسازییا دووماهییێ یا رێیا گەشەپێدانێ تەمام بوویە، ئەو پڕۆژە ب درێژاهییا 11 کیلۆمەتران ل پارێزگەها دهۆکێدا  دێ دەربازبیت و دێ گەهیتە وەلاتێ توركیا” هەروەسا مە هەماهەنگییەكا تەمام  ل گەل حکومەتا هەرێما کوردستانێدا کرییە و مە کۆمبوون ژی ل گەل  پارێزگارێ دهۆکێدا کرییە.

ناڤهاتی گۆت ژی: ئەڤ پڕۆژە زۆر یێ مەزنە و ب راوێژکرنێ ل گەل شیرەتکار و شارەزایێن نێڤدەولەتی هاتییە کرن، دێ شێت عێراقێ بەتە قووناغەكا نوو و ب هزاران دەلیڤێن کاری دێ بۆ گەنجان پەیداكەت.

درێژاهییا پڕۆژێ رێیا گەشەپێدانێ هزار و 200 کیلۆمەترن و ژ هێلێن ڤەگوهاستنا کەلوپەل و گەشتیاران و هێلا ئاسنی، ل بەندەرێ فاو ل پارێزگەها بەسرا درێژ دبیت بۆ ناڤا ئاخا تورکیا” خەرجییێن وی پڕۆژەیی 17 ملیار دۆلارن، 10.5 ملیار دۆلار بۆ کڕینا شەمەندەفەرێن کارەبایی یێن نوو و 6.5 ملیار دۆلار بۆ درێژکرنا هێلا ئاسنی دێ هێنە تەرخانكرن.

قووناغا ئێكێ یا وی پڕۆژەیی ل سالا 2028 ێ دێ تەمام بیت، قووناغا دیتر ل سالا 2050 ێ دێ تەمام بیت.