حکومەتا عیراقێ دڤێت نەفتا بەسرا ب رێکا بۆریا نەفتا هەرێما کوردستانێ بۆ بەندەرێ جیهانیێ تورکیا بهنێریت.
وەزیرێ نەفتێ یێ عیراقێ رادگەهینیت، د ڤان نێزیکان دا دۆسیا هناردەكرنا نەفتێ ب رێکا بەندەرێ جیهانیا تورکیا، دێ چالاک کەن.
حەیان عەبدولغەنی، جێگرێ سەرۆک وەزیران بۆ کاروبارێن وزە و وەزیرێ نەفتێ یێ عیراقێ دبێژیت، “د ڤان نێزیکان دا دۆسیا هناردەكرنا نەفتێ ب رێکا بۆریا نەفتێ ڤە بۆ بەندەرێ جیهانیێ تورکی دێ چالاک بیت و ئەگەرێ زێدەکرنا نەفتێ ژی ژ نەفتا بەسرا ب رێکا ڤێ بۆریێ ڤە هەیە.”
وەزیرێ نەفتێ عیراقێ ئەڤ ئاخڤتنە د دەمێ كۆمبوونا کومیتا عیراقی-تورکی دا کرن، کو ئەڤرۆ هاتە ئەنجامدان.
ل گۆرەی راگەهاندنەکا وەزارەتا نەفتێ یا عیراقێ، ئەڤرۆ (پێنجشەمب، ٠٦-٠٣-٢٠٢٥) حەیان عەبدولغەنی ل بەغدا سەرۆکاتیا كۆمبوونەكێ کریە بۆ گەنگەشەکرن ل سەر کارێن کومیتا هەڤپشک یا عیراقی-تورکی، ب ئامادەبوونا ئەندامێن کومیتێ ژ وەزارەتێن عیراقێ.
وەزیرێ نەفتێ دووپاتی ل سەر گرنگیا وان دۆسیان کر، کو پەیوەندی ب کارێن کومیتێ ڤە هەیە، ب تایبەتی دۆسیا ئاڤ و نەفتێ.
ب پێدڤی ژی زانی؛ دۆسیا ئاڤێ بهێتە چالاککرن ب شێوەیەکێ کو خزمەتا بەرژەوەندیێن عیراقێ بکەت د بدەستڤەئینانا پشکەکا دادپەروەرانە یا ئاڤێ دا.
د كۆمبوونێ دا گەنگەشە ل سەر وان بابەتان هاتە کرن، یێن کو د کارنامەیێ کاری دا هاتین و تایبەتن ب کومیتەیێن لاوەکی د وارێن ئاڤێ، وزە و نەفتێ، پەروەردێ، دەروازێن سنووری و پەیوەندیان، ئالوگۆرا بازرگانی، دۆسیا وەرزش و گەنجان.
كۆمبوون گەهشتە وی ئەنجامی؛ گرنگە پێدڤیێن تەکنیکی یێن کومیتەیان بهێنە تەمامکرن، کومیتەیێن هەڤپشک دگەل لایەنێ تورکی بهێنە چالاککرن ب شێوەیەکێ کو خزمەتا بەرژەوەندیێن وەلاتی بکەت.
