مەسرور بارزانی پێشوازی ل بالیۆزا كەنەدا كر

مەسرور بارزانی، سەرۆكێ حكومەتا هەرێما كوردستانێ پێشوازی ل كاتی بۆنكا، بالیۆزا كەنەدا ل عیراقێ كر ب هەلكەفتا ب دوماهیهاتنا ئەركێ وێ.

د دیدارێ دا مەسرور بارزانی سوپاسییا بالیۆزا کەنەدا کر كو د ڤی ماوەی دا کار بۆ پێشڤەبرنا پەیوەندییێن دوولایەنی کرییە و هیڤییا سەركەفتنێ د ئەركێ وێ یێ بهێت دا بۆ خواست.

ژلایێ خۆ ژی ڤە بالیۆزا کەنەدا خواستا وەلاتێ خۆ بۆ ب هێزترکرنا پەیوەندییان ل گەل هەرێما کوردستانێ دووپاتكر و ڕاگەهاند، بڕیارە شاندەکێ کۆمپانیایێن کەنەدا یێن تایبەتمەند د کەرتێ چاندنێ دا د پاییزا ئەڤسالە دا سەرەدانا هەرێمێ بکەت.
ڕەوشا پەیوەندییێن هەرێمێ و حکومەتا فیدرال هاتە گوتوبێژكرن و ئاماژە ب گوتوبێژێن دوو ڕۆژێن بووری یێن هەردوو جڤاتێن ئابووری یێن فیدرال و هەرێمێ ل هەولێرێ هاتەكرن.