بەرپرسه‌كێ رەوتێ حیکمە: سەرۆک بارزانی دێ پشكدارییێ د کۆمبوونا چارچوڤێ هه‌ماهەنگییێ دا كه‌ت

بڕیارە سوبەهی چارشەمبی” سەرۆک بارزانی سەره‌دانا بەغدا بکه‌ت، بەرپرسه‌كێ رەوتێ حیکمە یێ نیشتمانی دبێژیت، سەرۆک بارزانی د کۆمبوونا لایەنێن ناڤا چارچوڤێ هه‌ماهەنگییێ دا ل مالا عەمار حەکیمی، سەرۆکێ ره‌وتێ حیکمە یێ نیشتمانی دێ پشكدار بیت.

د. محەممەد حسام حسێنی، بەرپرسێ مەکتەبا پەیوەندییێن نیشتمانی و ئەندامێ مەکتەبا سیاسییا رەوتێ حیکمە یێ نیشتمانی دیار كر: سەره‌دانا سەرۆک مەسعود بارزانی زۆرا گرنگه‌، ئەو دێ د کۆمبوونا چارچوڤێ هه‌ماهەنگییێ دا پشكدار بیت ل مالا عەمار حەکیمی.

 ناڤهاتی گۆت ژی: د وێ کۆمبوونێدا گه‌له‌ك دۆسییە و بابەتێن گرنگ دێ هێنه‌ به‌حسکرن و مێهڤانداریکرنا کەساتییەکێ وەکو کاک مەسعودی دێ گرنگییه‌كا زێده‌تر ده‌ته‌ وێ كۆمبوونێ، هه‌روه‌سا دۆسییەیێن ناڤخۆیی یێن عێراقێ، دیسا هژمارەكا بابەتێن دەرڤه‌ و هەرێمی دێ هێنه‌ به‌حسكرن.