فه‌ره‌نسا بزاڤێن نێچيرڤان بارزانى بۆ چارەسەركرنا كێشەیێن هەولێر – بەغدا بلند د نرخینیت

سپێدەهییا ئەڤرۆ ڕۆژا ئێكشەمبی نێچيرڤان بارزانى، سه‌رۆكێ هه‌رێما كوردستانێ ل هه‌ولێرێ ل ‌گه‌ل پاتريك دۆرێل، باليۆزێ فه‌ره‌نسا ل‌ عیراقێ كۆمبوو‌.

د كۆمبوونێ دا كو كۆنسولێ گشتی یێ فه‌ره‌نسا ل‌ هه‌رێمێ ژی ئاماده‌ بوو، دۆپاتی ل سەر پێشڤەبرنا پەیوەندییێن فەرەنسا ل گەل عیراقێ و هەرێما كوردستانێ هاتەكرن و هه‌ردوولا تیشك ئێخستە سەر دەرفەتێن بەرفرەهكرنا هاریكارییا هەڤپشك د هەمی بواران دا.

هەروەسا بیروڕا ل دۆر ڕەوشا هه‌رێما كوردستانێ هاتنە ئالوگۆڕكرن و هه‌ردوولا د هەڤڕابوون ل سەر ئه‌نجامدانا هەلبژارتنێن پەڕلەمانێ كوردستانێ د‌ دەمەكێ گونجاى یێ ئه‌ڤسالە دا ب پشكدارییا هه‌می لايه‌نێن‌ سياسي و پێكهاتەیێن كوردستانێ.

د ته‌وه‌رەكێ دی یێ كۆمبوونێ دا بەحس ل گرنگییا گوتوبێژان بۆ چارەسەركرنا كێشەیێن هه‌ولێر ـ به‌غدا هاتەكرن و به‌ره‌ڤپێشچوونا په‌يوه‌ندييێن هه‌ردوولا ب ئه‌رێنى هاتە هه‌لسه‌نگاندن، ل دۆر ڤێ یەكێ باليۆزێ فه‌ره‌نسا بزاڤێن سه‌رۆكێ هه‌رێمێ بلند نرخاندن و پشتەڤانییا وەلاتێ خۆ بۆ چاره‌سه‌ركرنا كێشه‌یان ده‌ربڕى.
پاراستنا ئێمناهییا سياسى ل عیراقێ، ڕەوشا دەڤەرێ و چەند پرسێن دی یێن جهێ بایەخا هەڤپشك، تەوەرەكێ دی یێ كۆمبوونێ بوون.