مەسرور بارزانی ، جێگرێ سەرۆكێ پارتی دیمۆكراتی كوردستان، ل بیرەوەریا 48ەمین سالڤەگەرا بەرپابوونا شۆرەشا گۆلانێ پەیامەك بەلاڤكر و تێدا پیرۆزباهی ل سەرۆك بارزانی و پێشمەرگە و تێكۆشەرێن پشكداری شۆرەشێ بووین، كر.
دەقێ پەیاما مەسرور بارزانی:
د 48 ەمین سالڤەگەرا بەرپابوونا شۆرەشا گۆلانێ دا، گەرمترین پیرۆزباهییان ئاراستەی جەنابێ سەرۆك بارزانی و هەمی پێشمەرگێن قەهرەمان و تێكوشەرێن پشكداری شۆرەشێ دكەم.
شۆرەشا گۆلانێ كو درێژەپێدەرا شۆرەشا ئەیلوولێ بوو ب رابەراتییا بارزانییێ نەمر، هیڤی و ئومێدێن مەزن بۆ خەلكێ كوردستانێ ڤەگراندن و پیلانگێرێن دوژمنێن گەلێ كوردستانێ ژناڤبرن كو دڤیان دووماهییێ ب شۆرەش و خەباتا رەوا یا خەلكێ كوردستانێ ل پێناڤی مافێ وان یێ رەوا بینن، چونكی خۆراگرییا خەلكێ كوردستانێ و ئێكرێزی و هەلویستێ بهێز یێ لایەنێن كوردستانێ بوویە ئەگەرێ ب دەستڤەئینانا چەندین دەستكەفتێن مەزن یێن نەتەوەیی كو یا ژ هەمییان مەزنتر ڕاپەرینا شكۆدار یا 1991 و هەلبژارتنێن پەرلەمانی و پێكئینانا حكومەتا هەرێما كوردستانێ بوو.
ل 48ەمین سالیا بەرپاببونا شورەشا گولانێ ، ب رێزڤە بیرەوەرییا هەمی وان خەباتكەر و تێكوشەرێن پشكدار و ب تایبەت سەركردێ هەمی دەمان ل یاد، ئدریس بارزانی.
سلاڤ ل گیانێ پاك یێ شەهیدێن شۆرەشا گۆلانێ و هەمی شەهیدێن كوردستانێ.
مەسرور بارزانی
جێگرێ سەرۆکێ پارتی دیمۆکراتی کوردستان
