كۆمپانییه‌كا خۆمالى ل هه‌ولێرێ ترۆمبێلێن ئاگرڤه‌مراندنێ دروست دكه‌ت و نووترین ترۆمبێل ب دیزاینه‌كێ سه‌رنجراكێش و كوالیتییه‌كا پێشكه‌ڤتى به‌رهه‌مئینایه، ئه‌ڤساله نووترین مۆدێل به‌رهه‌مئینایه و دێ هنێریته دوبه‌ى و بازارێن ئورۆپا.
ئاماژه ب هندێ ژى دا، حكومه‌تا ئیماراتێ ب ڕێیا كۆمپانییه‌كێ داخوازا كرینا 10 ترۆمبێلان كرییه، هه‌روه‌سا پشتى ب ڕێیا كۆمپانییا ( مۆبیاك ) یا یونانى سه‌ره‌دانا كارگه‌هێ ل كوردستانێ كرى، داخوازا 30 ترۆمبێلان كرییه كو دێ بۆ بازارێن ئورۆپا هنێریت.
كارگه‌ها به‌رهه‌مئینانا ترۆمبێلێ ل هه‌ولێرێیه، شیان هه‌نه سالانه 35 ترۆمبێلێن ئاگرڤه‌مراندنێ یێن پێشكه‌ڤتى به‌رهه‌مبینیت، دروستكرنا هه‌ر ترۆمبێله‌كێ 40 ڕۆژان ڤه‌دكێشیت و 46 ئه‌ندازیار و كرێكارێن كورد ل سه‌ر كار دكه‌ن.
ترۆمبێل ل دووڤ ستانداردێن وه‌لاتێ نه‌مسا هاتییه دروستكرن و 10 هزار لیترێن ئاڤێ و هزار و 500 لیترێن فومى هه‌لدگریت، 12 سۆنده هه‌نه و مونیته‌رێ ل سه‌ر ترۆمبێلێ شیان هه‌نه هه‌تا 80 میتران ئاڤێ پاڤێژیت، هه‌روه‌سا تایبه‌تمه‌ندییێن قورتالكرنێ ب خۆڤه‌دگریت و كه‌لوپه‌لێن پێدڤى بۆ هاتینه دابینكرن.
حكومه‌تا هه‌رێما كوردستانێ ب ڕێیا وه‌زاره‌تا ناڤخۆ و په‌یمانگه‌ها به‌رگرییا شارستانی چاڤدێرییا كوالیتییا ترۆمبێلێ دكه‌ت، دهه‌مان ده‌مدا پشته‌ڤانییا پرۆژه‌یێ به‌رهه‌مئینانێ دكه‌ت و داخوازا چه‌ند ترۆمبێلان ژ وى جۆرى كرییه.
