ل دھۆکێ لژنەکا بلند بۆ بەرھنگاربوونا تایا خوینبەربوونێ ھاتییە پێکئینان

ئاژانسا خانی” تایبەت:

رێڤەبەرێ گشتییێ ساخلەمییا پارێزگەھا دھۆکێ ئاشکراکر، ب تنێ دو حالەتێن تایا خوینبەربوونێ ل دھۆکێ ھاتینە تۆمارکرن و لژنەکا بلند ژی ھاتییە پێکئینان بۆ بەرھنگاربوونا ڤایرۆسێ تایا خوینبەربوونێ.

د. ئەفراسیاب موسا، زێده‌تر بۆ ئاژانسا خانی دیارکر” لژنەکا بلند ب سەرپەرشتیا جێگرێ پارێزگارێ دھۆکێ بۆ بەرھنگاربوونا تایا خوینبەربوونێ ھاتییە پێکئینان و رێنمایی ھاتینە دەرکرن بۆ چاوانییا سەرەدەرییا وان کەسێن ل کوشتارگەھێن دھۆکێ کار دکەن، بەرچاڤکو دەزگورگ ھاتینە بەلاڤکرن ل سەر وان کەسێن کارێ سەربڕینێ دکەن.

ناڤهات گۆت ژی” دو حالەتێن تایا خوینبەربوونێ ل دھۆکێ ھاتینە تۆمارکرن، کو ئێک ژ وان گیانێ خۆ ژ دەستدایە، ل سەر ئاستێ جیھانێ چو چارەسەریێن تایبەت بۆ تایا خوینبەربوونێ نینن، ب تنێ ھندەک جۆرێن دەرمانان دھێنە بکارئینان و ل بازاڕی ھاتینە کڕین بۆ وان کەسێن تووشی تایا خوینبەربوونێ بووین.