رێبوار بابکەیی: پێدڤییە وەزیرێ پەروەردێ داخوازا لێبۆرینێ بکەت

ئاژانسا خانی ، تایبەت:

ل حەفتییا بوری وەزیرێ پەروەردا عێراقێ بڕیاردایە ھەر قوتابییەکێ نمرەکا پێدڤی نەئینیت ل وانا زمانێ کوردی ب دەرنەچوویی ناھێتە ھژمارتن و پەرلەمانتارەک ژی دبێژیت، بڕیارەکا شاشە و پێدڤییە وەزیرێ پەروەردێ داخوازا لێبۆرینێ بکەت.

رێبوار بابکەیی، ئەندامێ پەرلەمانێ کوردستانێ بۆ ئاژانسا خانی دیار کر” ئەو بڕیار بڕیارەکا نە دجھێ خوە دایە و بەرۆڤاژی ده‌ستوورێ عێراقێیە بۆ بێ بھاکرنا زمانێ کوردی، چونکی بزاڤەکە بۆ بنپێکرنا پێکڤەژیانا پێکھاتێن عێراقێ، پێدڤییە وەزیرێ پەروەردا عێراقێ داخوازا لێبۆرینێ بکەت و بڕیارا خوە لدۆر وانا زمانێ کوردی ھەلوەشینیت، دەمێ وەزیرێ پەروەردێ قوتابیا لسەر بنگەھێ کەرب و کینێ و رەگەز پەرستیێ پەروەردە بکەت، چ ئومێد نامینن بۆ جڤاکی.

رێبوار بابکەیی گۆت ژی” ئەرکێ سەرەکییێ وەزیرێ پەروەردێ ئەوە کار بۆ پاراستنا بھایێن پەروەردەیی و مرۆڤی بكه‌ت، ھەروەسا بھایێن پێکڤەژیانێ بکەتە کارێ خوە یێ سەرەکی و قوتابیان لسەر ئەوی بنگەھی پەروەردە بکەت، ڤیان بۆ زمانێ کوردی رامان ئەڤە رەوشنبیریا لێبۆرینێ و پێکڤەژیانێ یە ل عێراقێ، مخابن بڕیارا وەزیرێ پەروەردا عێراقێ ئەڤە مادەم قوتابیەک ئەگەر نمرەکا پێدڤی ژی نەئینیت ل زمانێ کوردی ب دەرنەچوو ناھێتە ھژمارتن ئەڤەژی بێ بھاکرنا زمانێ کوردییە، لەوما وەزیرێ پەروەردێ شاشیەکا مەزن کرییە و دڤێت داخوازا لێبۆرینێ ل گەلێ کورد بکەت و پێداچوونێ ب بڕیارا خوە دا بکەت.