شیره‌تكاره‌كێ دارایى یێ سه‌رۆك وه‌زیرێن عیراقێ راگه‌هاند، پێشبینى دهێته‌كرن داهاتێ گشتى یێ عیراقێ بۆ ئه‌ڤساله ژ 150 ملیار دۆلاران ده‌ربازبیت.
مه‌زهه‌ر محه‌مه‌د سالح، شیره‌تكارێ دارایى یێ سه‌رۆك وه‌زیرێن عیراقێ راگه‌هاند، ل گوره‌ى پێشبینییێن سندۆقا نه‌ختینه‌یى یا ناڤده‌وله‌تى، دهێته پێشبینیكرن د ئه‌ڤساله‌دا رێژا داهاتێ گشتى یێ په‌ترۆلێ و داهاتێن دى ل عیراقێ ب ره‌نگه‌كێ به‌رچاڤ زێده‌ببیت.
دیار ژى كر، سندوقا نه‌ختینه‌یى یا ناڤده‌وله‌تى داهاتێ په‌ترۆلا خاڤ یا عیراقێ ب 3 ملیۆن و 400 هزار به‌رمیلێن په‌ترۆلێ یێن رۆژانه دیاركرییه كۆ هه‌ر به‌رمیله‌ك ب 104 دۆلاران بهێته فرۆتن. هه‌روه‌سا داهاتێن دى ژى كێمتر نابن ژ 8 بۆ 10 ملیار دۆلاران، ئه‌گه‌ر داهاتێن په‌ترۆلێ و داهاتێن دى بهێنه سه‌ر داهاتێن نافخۆ، ل دوماهییێن سالا 2022ێ دێ ژ 150 ملیار دۆلاران ده‌ربازبن.
سندۆقا نه‌ختینه‌یى یا ناڤده‌وله‌تى پێشبینییا زێده‌بوونا داهاتێ عیراقێ كرییه ژبه‌ر بلندبوونا بهایێ په‌ترۆلێ د ئه‌ڤساله دا، كۆ به‌راورد ب سالا 2021ێ داهات دێ 73 ژ سه‌دێ زێده‌بیت.
