فراکسیۆنا پارتی ل پەرلەمانێ کوردستانێ بەیاننامه‌ك ده‌ربارەی شەرێ پەکەکێ و تورکیا و زیانگەهاندن ب ژینگەها کوردستانێ به‌لاڤكرییه.
دەقێ وێ بەیاننامێ:
ب داخڤە شەرێ پەکەکێ و تورکیا هەرده‌م مالوێرانی بۆ سەر ژیان و ژینگەها کوردستانێ و کاڤل کرنا گوندان و نەهێلانا ژیانێ هەبوویە ل ده‌ڤه‌رێن سنوورى دا.
ئه‌م نەکو نوكه ل سه‌ر داربڕینێ بەلکو ل ده‌می بوورى ژى مه راگەهاندییە بلا ئێدى خەلکێ سڤیل نەبنە قوربانی و نه‌هێنه شەهید کرن، بلا ئەڤ کێشە دناڤا ئاخا تورکیا دا بهێته چارەسەر كرن و خەلكێ هەرێما کوردستانێ و ژینگەها کوردستانێ و ئاژەل و سروشتێ کوردستانێ نەبنە قوربانیێن ڤى شەرى.
وەک چاوا داخوازێ ژ حکومەتا تورکیا دکەین خەلكی سڤیل و سروشتێ کوردستانێ و گوندێن مه نه‌كه‌نه قوربانی کێشەیا خوه ل گه‌ل پەکەکێ، د هەمان ده‌مدا دبێژین پەکەکێ هەرده‌م به‌هانه داینە دەست تورکیا و بەرپرسیارانه مامەله ل گەل ره‌وشا هەستیار و نازك یا هەرێما کوردستانێ نەکرییە و ئه‌و به‌هانه‌یا دده‌نه توركیا بهێنه دناڤا ئاخا هه‌رێمێ دا.
ل ڤێرێ داخوازێ ژ حکومەتا ئێراقێ دکەین وان هەلویست هه‌بیت و دڤێ کێشەیێ دا بێلایەن نەبن، هەم ل گەل دەولەتا تورکیا باخڤن و هەم ژى په‌یامه‌كا رووهن بده‌نه په‌كه‌كێ.
هەر دڤى بارى دا مه یاداشته‌ك ئامادەکرییە بۆ سەرۆکاتییا پەرلەمانێ کوردستانێ و داخوازییا رێکارێن پێدڤی یێن په‌رله‌مانی و روونشتنه‌كا تایبه‌ت دکەین ل سەر ڤێ پرسێ.
