پشتی حەفتییەكێ ژ پەسەندكرنا قانوونا دادوەرییا ژنێن ئێزدى یێن رزگاربویێن ژ دەستێ داعشێ، ب هەلكەفتا هەشتی ئادارێ رۆژا جیهانی یا ژنان، د. بەرهەم سالح سەرۆككۆمارێ ئیراقێ ئەو قانوونه ئیمزا كر و گۆتییه، د شەرێ داعشێ دا ژنان گه‌له‌ك نەهامەتی دیتینە.
ئه‌ڤرۆ د مەراسیمەكێ دا ل جڤاتا نوونەرێن ئیراقێ، كو هەر ئێك ژ سەرۆككۆمار و سەرۆكێ دەستهەلاتا دادوەرییا ئیراقێ و عەمار حەكیم سەرۆكێ باسكێ حیكمە تێدا پشكداربوون، د. بەرهەم سالحى قانوونا دادوەرییا ژنێن ئێزدى یێن قورتالبوویی ئیمزا كر و گۆت: داعشێ گه‌له‌ك نەهامەتى ب سەرێ كچ و ژنێن ئێزدی دا ئینایینە، ژنان ژى چەك ل دژی داعشێ هەلگرتینه و شه‌هید بووینه.
ئارمانج ژ قانوونا دادوەرییا ژنێن ئێزدى یێن قورتالبوویی ژ دەستێ داعش پێكهاتییه ژ:
ـ هەموو ژنێن ئێزدى یێن قورتالبوویی بهێنە قەرەبوو كرن.
ـ مووچەكێ هەیڤانە بۆ ژنێن قورتالبوویی بهێتە دابینكرن.
ـ پارچەكا ئەردی یان یەكەیەكا ئاكنجیبوونێ بۆ بهێتە دابینكرن.
ـ پێدڤییە ژیانەكا ئاسودە بۆ ژنێن قورتالبوویی بهێتە دابینكرن.
ـ پێدڤییە خزمەتێن ساخلەمیێ بۆ ژنێن قورتالبوویی بهێنە پێشكێشكرن.
ـ دڤیت ژێرخانا دەڤەرێن ئاكنجیبوونا ژنێن قورتالبوویی بهێنە ئاڤەدانكرن.
ـ كار بهێتەكرن بۆ تێكەلكرنا ژنێن قورتالبوویی و زارۆكێن وان د ناڤ جڤاكی دا.
ـ پێدڤییە رەوشا قانوونییا زارۆیێن ژنێن قورتالبوویی بهێتە چارەسەر كرن.
