بالیۆزێ ئه‌مریكا ل ئیراقێ دچارچووڤێ سه‌ره‌دانا خۆه دا بۆ هه‌ولێرا پایته‌خت سه‌ره‌دانا فرۆكخانا ناڤده‌وله‌تى یا هه‌ولێرێ كر.
ل گۆره‌ى راگه‌هاندنه‌كا په‌یجێ فه‌رمى یێ كۆنسۆلخانا گشتى یا ئه‌مریكا ل هه‌ولێرێ، ماتیۆ تۆله‌ر، بالیۆزێ ئه‌مریكا ل ئیراقێ ب هه‌ڤالینییا كۆلۆنێل سكۆت دیسۆرمۆ، فه‌رماندێ بنگه‌هێ ئه‌سمانى یێ هه‌ولێرێ یێ هێزێن ئه‌مریكا سه‌ره‌دانا فرۆكخانا ناڤده‌وله‌تى یا هه‌ولێرێ كر و دگه‌ل رێڤه‌به‌رێ گشتى یێ فرۆكخانێ ئه‌حمه‌د هۆشیار محه‌مه‌د ئه‌مین كومبوو.
د كۆمبوونێ دا ماتیۆ تۆله‌ر راگه‌هاند؛ ئه‌مریكا پابه‌نده ب به‌رده‌وامیدان ب كاركرنێ دگه‌ل ده‌ستهه‌لاتدارێن فرۆكخانێ ژ بۆ دابینكرنا ئاسایشێ و هاریكارییا ته‌كنیكى یا پێدڤى بۆ وێ ناڤه‌ندا گرنگ یا هاتن و چوونا ئه‌سمانى.
سه‌ره‌دانا بالیۆزێ ئه‌مریكا ل ئیراقێ بۆ فرۆكخانا ناڤده‌وله‌تى یا هه‌ولێرێ پشتى وێ هێرشا مووشه‌كى هات یا ل شه‌ڤا 15 ل سه‌ر 16 ى شۆباتێ ل سه‌ر باژێرێ هه‌ولێرێ هاتییه‌كرن و هژماره‌كا مووشه‌كان ل بنگه‌هێ سه‌ربازى یێ هێزێن ئه‌مریكا ل فرۆكخانا ناڤده‌وله‌تى یا هه‌ولێرێ كه‌تنه خوار.
