ره‌وش ل شنگالێ ئالۆزه، په‌كه‌كه و حه‌شدا شه‌عبی رۆژانه هێزێن خوه ل شنگالێ زێده دكه‌ن و نها شنگال د ده‌ستێ وان دایه، ل گۆر زانیاریێن ده‌ست ب خانی نیوز كه‌فتین، هژماره‌كا مه‌زن یا خه‌لكێ ل شنگالێ دژین ناڤێن خوه تۆماركرینه دوباره ڤه‌گه‌رن ل كه‌مپێن هه‌رێمێ بژین و هژماره‌كا ژ وان ڤه‌گه‌ریاینه ژی ژ به‌ر ره‌وشا ب مه‌ترسی یا ل شنگالێ.
مه‌حما خه‌لیل، قایمه‌قامێ شنگالێ بۆ خانی نیوز راگه‌هاند؛ پشتی رێككه‌فتنا دناڤبه‌را هه‌ولێر و به‌غدایێ دا، په‌كه‌كه و حه‌شدا شه‌عبی رۆژانه هێزێن خوه ل شنگالێ زێده دكه‌ن و به‌رنامه‌یێ ب ته‌مامی داگیركرنا شنگالێ دانایه و ئه‌ڤه ژی بوویه جهێ مه‌ترسیێ و خه‌لكێ وێ تووشی نه‌هامه‌تییه‌كێ بوویه، ئێدی ئاواره ناڤه‌گه‌رن شنگالێ و هه‌روه‌سا هژماره‌كا مه‌زن یا خه‌لكێ نها ل شنگالێ ناڤێن خوه تۆماركرینه كو دوباره شنگالێ بجهـ بهێلن و بزڤرن ل كه‌مپان بژین.
قایمه‌قامێ شنگالێ، ل دۆر رێككه‌فتنا شنگالێ ژی گۆت: پێدڤییه رێككه‌فتنا شنگالێ بكه‌ڤت د وارێ بجهئینانێ دا ئه‌گه‌ر دێ مه‌ترسییه‌كا مه‌زن په‌یدا بیت و هه‌روه‌سا ئه‌و پاشه‌رۆژا شنگالێ خراب دبینیت و ب پێشبینیا وی شه‌ڕ رووناده‌ت چنكو شنگال هه‌ر بۆ وان مایه.
