لژنا تایبەت ب پرسا سۆتەمەنیێ ل پەرلەمانێ عێراقێ کۆمبوو و چەندین پێشنیار ئامادە کرینە كو تێدا داخواز دکەن بهایێ پانزینێ ل هەرێما کوردستانێ هەڤشێوەیێ پارێزگەهێن عێراقێ لێ بهێت.

لژنا دەمكی یا پەرلەمانێ عێراقێ بۆ چارەسەرکرنا کێشەیا سۆتەمەنیێ و بەرسڤدانا پێشنیارێن وەزارەتا نەفتێ و وەزارەتا سامانێن سروشتی، ل بەغدا کۆمبوو.

سیپان شێروانی، ئەندامێ لژنا نەفت و گازێ ل پەرلەمانێ عێراقێ و ئەندامێ فراکسیۆنا پارتی دیموکراتی کوردستان ڕاگەهاند، ئەو کۆمبوونە تەمام بوویە و مە دەرهاڤێژ و پێشنیارێن خۆ ئامادە کرینە، بڕیارە ئەڤرۆ د کۆنفڕانسەکێ رۆژنامەڤانیدا وان دیار بکەین، هەروەسا ل دووف وان راسپاردێن ئاراستەیی حکومەتێ دبن، دبیت مامەلە دگەل هەرێما کوردستانێ هەڤشێوێ پارێزگەهێن دی بیت یان پشکا دابینکرانا پانزینێ ژ داهاتێ نەفتا خاڤ بهێتە دیارکرن.

ناڤهاتی گۆت ژی: هەموو پێشنیار د بەرژەوەندییا وەلاتییێن هەرێما کوردستانێ دانە” لەوما یان دڤێت کۆمپانیا دابەشکرنا بەرهەمێن نەفتی یا وەزارەتا نەفتا عێراقێ پانزین و سۆتەمەنیێ بۆ هەرێما کوردستانێ دابین بکەت ب هەمان پیڤەر و بهایێن پارێزگەهێن دی (بەرامبەر وێ 50 هزار بەرمیلێن نەفتێ)، یان ژی ئەگەر نەفتا خاڤ بۆ هەرێمێ هاتە زێدەکرن، دبیت وەزارەتا نەفتا عێراقێ تێچوویێ بەرهەمئینان و پارزینگەهان ب ستوویێ خۆ ڤە بگریت داکو پانزین ب هەمان بهایێ دەڤەرێن دیتر بگەهیتە هەرێما کوردستانێ.