<h2>سەرۆكێ هەرێما كوردستانێ پێشوازی ل كۆنسولێ گشتییێ نوو یێ فرەنسا كر، دووپاتی ل ئامادەیی یا دامەزراوەیێن هەرێما كوردستانێ بۆ سەرخستنا كارێن وی كر، كۆنسولێ فرەنسا ژی پابەندییا وەلاتێ خۆ بۆ پێشڤەبرنا پەیوەندییان دگەل هەولێرێ دووپاتكر. سەرۆكایەتییا هەرێما كوردستانێ ڕاگەهاند، نێچیرڤان بارزانی، سەرۆكێ هەرێما كوردستانێ پێشوازی ل بالیۆز ئیمانوێل مینیۆ، كۆنسولێ گشتییێ نوو یێ فرەنسا ل هەرێما كوردستانێ كر. د دیدارا واندا، نێچیرڤان بارزانی زێدەباری پیرۆزباهییا دەستبكاربوونێ، هیڤییا سەركەڤتنێ بۆ كۆنسولی د ئەركێ ویدا خواست، ئامادەیی یا تماما دامودەزگەهێن هەرێما كوردستانێ بۆ سەرخستنا كارێن وی دووپاتكر. هەروەسا سەرۆكێ هەرێما كوردستانێ، سوپاسی و پێزانینێن هەرێما كوردستانێ بۆ دیرۆكا پەیوەندییێن دۆستانە و پشتەڤانییا بەردەواما فرەنسا بۆ گەلێ كوردستانێ دووپاتكر. ژلایێ خۆڤە، ئیمانوێل مینیۆ، كونسۆلێ گشتییێ نوو یێ فرەنسا خۆشحالییا خۆ ب دەستبكاربوونێ ل هەرێما كوردستانێ دەربری و دیاركر، فرەنسا پابەندە و دخوازیت پەیوەندییێن خۆ یێن دیرۆكی دگەل هەرێما كوردستانێ پتر پێشڤەببەت، ئاستێ هاریكارییا هەڤپشك د بیاڤێن جۆدا دا بەرفرەهتر لێبكەت.</h2>
