ل ئێڤاریا ئەڤڕۆ سێشەمبی 4/28، مەسرور بارزانی سەرۆکێ حکومەتا هەرێما کوردستانێ، ل گەل هژمارەکا وەبەرهێنەرێن هەرێما کوردستانێ کۆمبوو.
ل دەستپێکا کۆمبوونێ دا، سەرۆکێ حکومەتێ کورتییەک دەربارەیی گوهۆڕین و پێشڤەچوونێن ناڤخۆیا هەرێما کوردستانێ و عێراقێ و دەڤەرێ پێشکێش کر.
ل دۆر پێکئینانا کابینەیا نوو یا فیدرالی، سەرۆکێ حکومەتێ هیڤی خواست کو ئەڤ کابینە ببیتە ئەگەرێ سەرهلدانا سەردەمەکێ نوو ژ ئاشتی و سەقامگیرییێ ل عێراقێ، چارەسەرکرنا کێشێن دناڤبەرا هەرێمێ و حکومەتا فیدرالی دا ل سەر بنەمایێ دەستووری و ڕێزگرتن ل مافێن دەستووری و قەوارێ فیدرالییێ هەرێما کوردستانێ.
سەرۆکێ حکومەتێ گۆت، هەر ژ پشتی ئەنجامدانا هەڵبژارتنێن پەرلەمانێ کوردستانێ، مە حەز دكر د زووترین دەم دا کابینا نوو یا حکومەتا هەرێمێ بهێتە پێکئینان، هیڤیدارین ئێدی ئەڤ بابەتە گیرۆ نەبیت.
سەرۆکێ حکومەتێ سوپاسیا وەبەرهێنەرێن کوردستانێ و کەرتێ تایبەت کر، کو ڕۆلەکێ زۆر گرنگ هەبوویە د پشتەڤانیکرنا حکومەتا هەرێما کوردستانێ و پێشخستنا ئابۆری و بزاڤا بازرگانی ل کوردستانێ.
ل دووماهییێ، چەندین ڕاسپاردە و پێشنیار بۆ ڕووبڕووبوونا ئاستەنگ و کێشێن گرێدایی ب بزاڤا ئابۆری و بازرگانی هاتنە پێشکێشکرن، سەرۆکێ حکومەتێ بەرسڤا سەرنج و تێبینی و پرسیارێن ئامادەبوویان دا.
