<h2>وەلاتێن ئەلمانیا، فرەنسا و بریتانیا د بەیاننامەکا هەڤپشکدا، بەرهەڤییا خۆ بۆ گرتنەبەرا ڕێکارێن بەرگرییێ یێن رێژەیی ڕاگەهاند، ب مەرەما ژناڤبرنا ژێده‌رێن شیانێن مووشەکی و درۆنی یێن کۆمارا ئیسلامی یا ئیرانێ.</h2> <h2> هەر سێ وەلاتێن ئەورۆپی ئاماژە ب وێ چەندێ کریە، پێنگاڤێن کریار دهاڤێژن بۆ بەرگریکرنێ ژ بەرژەوەندیێن خۆ و هەڤپەیمانێن خۆ ل دەڤەرێ، ئەڤە ژی ب ڕێیا ڕێگریکرنێ ل ته‌هرانێ ژ بۆ هاڤێژتنا مووشەك و درۆنان. د بەیانناما وان هاتییە: هێرشێن مووشەکی یێن ئیرانێ ب شێوەیەکێ بێ جوداهی هەڤپەیمانێن مە یێن نێزیك، هێزێن مە یێن چەکدار و وەلاتیێن سڤیل ل سەرانسەری دەڤەرێ کرینە ئارمانج.</h2> <h2> کیەر ستارمەر، سەرۆکوەزیرێ بریتانیا ڕاگەهاند، وەلاتێ وی ڕازیبوون ل سەر داخوازیا ئەمریکا نیشاندایە بۆ بکارئینانا بنکەیێن سەربازی یێن بریتانی، وان مۆلەت دایە بنگه‌هان بۆ مەبەستێن بەرگرییێ یێن تایبەت و سنووردار بهێنە بکارئینان، دا کو ڕێگرییێ ل ئیرانێ بکەن ژ هاڤێژتنا مووشەکان و تێکشکاندنا کۆگەهـ و جهێن هاڤێژتنا وان.</h2> <h2> دهێته زانین، ئەڤ بەیاننامە پشتی وێ چەندێ دهێت کو ته‌هرانێ وەك بەرسڤ بۆ هێرشێن ئەمریکا و ئیسرائیلێ، چەندین هێرشێن توند بۆ سەر وەلاتێن جیران و ئیسرائیلێ ئەنجامدان، ل دووڤ ژێدەرێن هەوارچوونێ، ب تنێ ل ئیسرائیلێ نه‌هـ کەس هاتینە کوشتن و واشنتن ژی كوشتنا سێ سەربازێن خۆ ڕاگەهاند.</h2>
