لدووڤ راپۆرتەکا میدیایی یا ئیسرائیلی کو ئەڤڕۆ ئێکشەمبی هاتیە بەلاڤکرن، سووریا و ئیسرائیل ب ناڤبەینکارییا ئەمریکا ل ئیمزاکرنا رێککەفتنەکا ئەمنی نێزیک بوویینە” راپۆرت ئاماژێ ب وەرچەرخانەکا ب لەز دکەت د پەیوەندییان دا، کو خۆ د سیناریۆیا ب کرێدانا بلنداهیێن جۆلان بۆ ماوێ ٢٥ سالان و ئەگەرێ ڤەکرنا بالیۆزخانا ئیسرائیل ل دیمەشقێ دبینیتەڤە.
کەنالێ (i24NEWS) یێ ئیسرائیلی ژ زارێ ژێدەرەکێ نێزیکی ئەحمەد شەرعی، سەرۆکێ سووریێ بەلاڤکریە، کو گۆتوبێژ ب ناڤبەینکاریا واشنتۆن بڕێڤە دچن، کو دەرگەهی بۆ رێککەفتنەکا ئەمنی و هەماهەنگیەکا بەرفرەھ د ناڤبەرا دیمەشق و تەلئەڤیڤ دا ڤەدکەت، هەڤدوم بەحسێ پێنگاڤێن دبلۆماسی یێن بێ وێنە د ناڤبەرا هەر دو وەڵاتان دا دهێتە کرن.
بڕیارە ل ڤان نێزیکان بەرپرسێن بلندێن سوری و ئیسرائیلی ب چاڤدێرییا ئەمریکا، ل سەر رێککەفتنا ئەمنی کۆمببن.
تەوەرێ سەرەکی یێ گۆتوبێژان پێكدهێت ژ گەنگەشەکرنا پڕۆژەیێن ستراتیژی و ئابۆری یێن هەڤپشک د وان دەڤەرێن ڤەقەتیایی دا یێن کو دکەڤنە ناڤبەرا هەر دو وەڵاتان دا.
گەشبینییەکا زۆر هەیە کو بەری دووماهییا ئەڤ سالە بالیۆزخانەیا ئیسرائیلێ ل دیمەشقێ بهێتە ڤەکرن، ئەڤ چەندە ژ بەر وێ پێشڤەچوونا بەرچاڤ دهێت کو د پرسا پەیوەندیداربوونا سوورییێ ب رێککەفتنێن ئیبراهیمی ڤە دهێتە دیتن.
