شانده‌كێ ئەمنییێ عێراقێ ب پشكدارییا سوپاسالارێ پێشمەرگەیی دێ سەره‌دانا واشنتۆن كه‌ت

ئاژانسا خانی:

نوونه‌رێ حکومەتا ھەرێما کوردستانێ ل فەرماندەییا ئۆپەراسیۆنێن ھه‌ڤپشكێن عێراقێ راگەهاند، بڕیارە شانده‌كێ هه‌ڤپشكێ ئەمنییێ عێراقێ و ئەمریکا ب پشكدارییا نوونەرێ حکومەتا ھەرێما کوردستانێ سەره‌دانا واشنتۆن بکەن.

لیوا عەبدولخالق تەلعەت زێده‌تر دیاركر: “ھەموو شاندێن ئەمنی یێن عێراقی نوونەرێ حکومەتا ھەرێما کوردستانێ تێدایە و فەریق عیسا عوزێر، سوپاسالارێ پێشمەرگەیی تێدا پشكداره‌، نوونەره‌كێ سەرەکییە د ھەموو دانوستاندنێن دناڤبه‌را عێراقێ و ئەمریکا و بڕیارە شانده‌كێ ھه‌ڤپشكێ ئەمنییێ ئەمریکا و عێراقێ ب پشكدارییا نوونەرێ حکومەتا ھەرێما کوردستانێ سەره‌دانا واشنتۆن بکەن”.

ناڤهاتی گۆت ژی: مه‌ره‌م ژ وێ سەره‌دانێ ئه‌وه‌، پەیوەندییێن دناڤبه‌را عێراقێ و ئەمریکا باشتر لێ بهێن و دیسان دێ دانوستاندنێ ده‌ربارەیی ئەوان پرس و بابەتێن ل عێراقێ و ڤێ ده‌ڤه‌رێ دا هه‌ین كه‌ن” وه‌سا بریاره‌ شاندێ ھه‌ڤپشكێ ئەمنییێ ئەمریکا و عێراقێ  لڤان نێزیكان وێ سەره‌دانێ ئەنجام بدەن و بێی نوونەرێ حکومەتا ھەرێما کوردستانێ ئه‌و سەره‌دانە ناهێته‌ كرن.