رێژا کوردان دناڤ سازییێن ئه‌منی و سۆپایێ عێراقێ دا بۆ کێمتر ژ 3% ێ داکەفتییە

جێگرێ سەرۆکێ فراکسیۆنا پارتی دیموکراتی کوردستان ل په‌رله‌مانێ عیراقێ دیار كر: دڤێت هێزێن چەکدارێن عیراقێ و هێزێن ئەمنی ژ هەموو پێکهاتێن عیراقێ پێک بهێن و هەڤسەنگی دناڤبەرا وان دا بهێتە کرن.

مەریوان قەرەنی، زێده‌تر گۆت:” د نڤیسارەکا فەرمیدا” ل رۆژا 19/11/ 2023 ێ، وان ئاراستەیی محەمەد شیاع سوودانی، سەرۆک وەزیرێن عیراقێ کرییە، لدووڤ برگا ئێکێ ژ مادێ 9 ێ یێ دەستورێ هەمیشەیی یێ عیراقێ، دڤێت هێزێن چەکدارێن عێراقێ و هێزێن ئەمنی ل هەمی پێکهاتان پێک بهێن و هەڤسەنگی دناڤبەرا پێکهاتان دا بهێتە کرن، ژبەرکو بابەتێ هەڤسەنگییێ پشکەکە ژ وێ کارنامێ کو ژ دەمێ پێکئینانا حکومەتا سودانی ل پەرلەمانی دەنگ پێ هاتییەدان.”

گۆت ژی، د نڤیسارا خوە دا تەکەزی ل سەر هندێ کرییە، کو بنەمایێ عیراقا نوو پێکهاتییە ژ هەڤپشكی و هەڤسەنگی و داخواز ژی کرییە کو هەڤسەنگییا پێکهاتێ کوردی دناڤ سازیێن ئەمنی و سەربازیێن عیراقێ بهێتە کرن.”

ناڤهاتی گۆت ژی، ل دەمێ چێکرنا عیراقا نوو ژ 2003 ێ” هەتا نوكه‌،” هەڤسەنگییا پێکهاتێ کورد دناڤ سازییێن ئەمنی و سەربازی بەرچاڤ نەهاتییە وەرگرتن، نوکە ژی رێژا کوردان د ناڤ هێزێن ئەمنی و سەربازی بۆ کێمتر ژ 3% ێ داکەفتییە و د دەمێن بوری دا ب پلان و بەرنامە بزاڤا بێبەشکرنا کوردان دناڤ سازیێن ئەمنی و سەربازیێن عێراقێ دا هاتییە کرن” له‌وما پێدڤییە ئەڤ نە هەڤسەنگییە بهێتە راستڤە کرن و کورد ژ وەکو پێکهاتێن دی یێن عێراقێ پشکدار بن دناڤ هێزێن سەربازی و ئەمنیێن عیراقێ دا، هه‌روه‌سا نەبوونا کوردان دناڤ ئەوان هێزان دا، بەروڤاژی دەستوور و بنەمایێن عێراقا فیدرالینه‌.”