نێچیرڤان بارزانی: داخواز ژ موقتەدا سەدر دکەم گۆتوبێژێن هەمەلایەن دەستپێبکەت

سەرۆکێ هەرێما کوردستانێ داخواز ژ موقتەدا سەدر دکەت، گۆتوبێژێن هەمەلایەن دگەل هەمی لایەن و سەرکردەیان دەستپێبکەت ، ژ پێخەمەت چەسپاندنا سیستەمێ سیاسی ل عیراقێ و بهێزکرنا بزاڤا چاکسازی و چارەسەرییا عیراقیانە ل ناڤخۆییا وەلاتی.

ئەڤرۆ شەمبی 8 نیسانا 2023، نێچیرڤان بارزانی، سەرۆكێ هەرێما كوردستانێ، ل بەغدا پشکداری د رێوڕەسمێن 43 سالڤەگەرا شەهیدكرنا سه‌يد محەمەد باقر سەدر دا كر و د گوتارەکێدا ئاماژەکر، “ئەڤرۆ ئەم هەمی د ئەڤی ڕێوڕەسمیدا پێکڤە یادا تاوانەکا مەزن یا ڕژێما پێشتر یا بەعس ل بیر د ئینین ل بەرامبەر ڕابەرەکێ مەزن یێ بەڕەڤانییێ و زانایەکێ مەزن یێ جیهانا ئیسلامی کو ئەو ژی شەهید سەید محەمەد باقر سەدرە، هەروەسا بەرامبەر خویشکا وی، شەهید ئامینە سەدر کو ب بنت الهدى بەرنیاسە”.

هەروەسا سەرۆکێ هەرێما کوردستانێ رێزێن سەرۆک مەسعود بارزانی بەرامبەر شەهادەتا ئیمامێ شەهید محەمەد باقر سەدر، گەهاندنە ئامادەبوویێن رێورەسمی و حزبا دەعوە و هەمی مالباتا سەدری و گەلێ عیراقێ.