ئەڤرۆ سێشەمبی 4/4/2023 ێ” نێچیرڤان بارزانی، سەرۆكێ هەرێما كوردستانێ، پێشوازی ل جەنەرال ماتيوو ماركفارلن فەرماندێ گشتی یێ هێزێن هه‌ڤپەیمانان ل عێراقێ و سوورییێ و شانده‌كێ له‌شكه‌ری ل گه‌ل دا كر.
د كۆمبوونەكێ دا ب ئامادەبوونا كونسولێ گشتی یێ ئەمریكا ل هەرێما كوردستانێ، جەنەرال ماركفارلن سوپاسییا سەرۆك نێچیرڤان بارزانی كر بۆ پێنگاڤێن ئێكخستنا پێشمەرگەیی و پرۆسا چاكسازییێ ل وەزارەتا پێشمەرگەیی، هەروەسا بۆ رێورەسمێن راگەهاندنا دەست بكاربوونا هەردو فیرقەیێن (1) و (2) یێن هێزا پێشمەرگەیێ کوردستانێ د چارچۆڤێ وەزارەتا پێشمەرگەیی دا.
هەروه‌سا به‌حسێ گرنگییا ب هێزكرنا هەماهەنگییا دناڤبه‌را هێزێن هه‌ڤپەیمانان و هەرێما كوردستانێ كر د چارچۆڤێ هه‌ڤپەیمانییا نێڤدەولەتی دا بۆ به‌رهنگاربوونا تیرۆرێ و ته‌كه‌زی ل بەردەوامییا هاریكارییا هه‌ڤپشك كرییە بۆ تێكشكاندن و ژناڤبرنا داعشێ.
گرنگییا ڤه‌دیتنا چارەسەرییێ بۆ كێشێن هه‌لاویستی یێن هەولێر ـ بەغدا ب تایبەت كێشێن نەفت و بودجەیی، لایەكێ دیتر یێ وێ دیدارێ بوو.
