ئاشنا بابان: سەرەدانا وەزیرێ بەڕەڤانیا ئەمریکا دێ کاریگەری ل سه‌ر هه‌رێما كوردستانێ ھەبن

ئاژانسا خانی ” تایبەت:

شارەزایەکا پەیوەندییێن نێڤدەولەتی ئاشکرا کر، سەرەدانا وەزیرێ بەڕەڤانیا ئەمریکا دێ کاریگەری ل سەر ھەرێما کوردستانێ ھەبن و پشتەڤانییا ئەمریکا بۆ ھەرێمێ و ھێزێن پێشمەرگەیی دوپات کرییە.

ئاشنا بابان، شارەزا ل پەیوەندیێن نێڤدەولەتی بۆ ئاژانسا خانی دیار کر” عێراق و دەڤەر ب گشتی یێن د قووناغەکا ھەستاردا دەرباز دبن و سەرەدانا لوید ئۆستن وەزیرێ بەڕەڤانیا ئەمریکا بۆ ھەرێما کوردستانێ کاریگەرییێن خوە لسەر رەوشا عێراق و ھەرێمێ ھەیە، چونکی یا خویایە نوکە گۆھۆڕین ھەنە ل سەر ئاستێ دەڤەرێ و سەقامگیرییا عێراق و ھەرێما کوردستانێ ژی بۆ ئەمریکا زۆر گرنگە، ژبەرکو ھەرێم نوکە پشکەکە ژ تەناھییا دەڤەرێ و رۆل ھەیە ل سەقامگیریا عێراقێ و دەڤەرێ.

ناڤهاتییێ گۆت ژی” کوردان پشکداری د حوکمەتا عێراقێ دا کرییە و رێکكەفتن ھەیە دناڤبەرا ھەردو ئالییان دا، له‌وما بۆ ئەمریکا یا گرنگە ھەردو ئالی بگەھنە رێکكەفتنێن باش و لێک تێگەھشتن ھەبیت دناڤبەرا ھەرێم و بەغدا دا” خاللا دیتر یا سەره‌دانا وەزیرێ بەڕەڤانیا ئەمریکا بۆ ھەولێرێ پشتەڤانیا ئەمریکایە بۆ ھێزێن پێشمەرگەیی و ئەمنی، کو ھەموو جیھان دزانیت پێشمەرگەیی رۆلەکێ مەزن ھەبوویە ل بەرھنگاریا تیرۆرستێن داعشێ دا.