نێچیرڤان بارزانی سەرۆكێ هەرێما كوردستانێ ب هەلكەڤتا هاتنا سالا نوویا زایینی 2023 پەیامەك بەلاڤكر و راگەهاند، سالا نوو یا زایینی ژ مالباتێن سەربلندێن شەهیدان، پێشمەرگەیێن قەهرەمان، هێزێن ئێمناهییێ و هەمی گەلێن كوردستانێ و ئیراقێ و جیهانێ پیرۆز دكەم، هیڤیدارم سالا گەهشتنێ بیت ب هیڤیان و سەركەڤتنێ و نەمانا شەڕ و ئالۆزی و ڤایرۆس و نەخۆشییان، ئارامی و ئاسایش و سەقامگیری د ناڤ هەمی مرۆڤاتییێدا بەلاڤ بیت.
نێچیرڤان بارزانی گۆتییە ژی، دڤێت بەرژەوەندییا گەلێ كوردستانێ، ئارمانجا سەرەكییا هەمییان بیت، دا ل گەل دەستپێكرنا سالا نوو، ئێكرێزی، تەبایی، پێكڤە ژیان، هەڤدوو قەبولكرن و هاریكارییا هەڤپشك بكەینە بەرپەرەرەكێ نوویێ پەیوەندییا د ناڤبەرا هێز و ئالییێن سیاسی و هەموو پێكهاتێن هەرێما كوردستانێ. پێدڤییە كار بكەین بۆ پاراستن و مسۆگەركرنا مافێن دەستووری و فیدارلی و چارەسەركرنا ئاریشەیێن ل گەل حكومەتا فیدرالییا ئیراقێ ل سەر بنەمایێ دەستووری.
گۆتییە ژی، ئەم دووپات دكەین كو هەرێما كوردستانێ ئەرك و بەرپرسیارییێن هەڤپشكێن خوە بجهـ دئینیت و وەكو هەردەم دێ فاكتەرێ ئارامی و سەقامگیرییێ بیت، بۆ هەمی هاریكارییەكێ ژی بەرهەڤە ژ پێناڤ رووبرووبوونا ئالنگارییان و چارەسەركرنا ئاریشەیێن وەلاتی، بۆ دابینكرنا ئارامی و سەقامگیرییا سیاسی و ئێمناهی ل ئیراقێ ب شێوەیەكی كو مافێن هەمی پێكهاتێن وەلاتی پارستی بن.
دوپاتكریە ژی، ل گەل وەلاتێن جێران و دەڤەرێ و دۆست و هەڤپەیمانێن نێڤدەولەتی، گرنگییێ ب پەیوەندییێن خوە ل سەر بنەمایێ رێزگرتنی و بەرژەوەندییا هەڤپشك ددەین، د هاریكاریكرنا هەڤپشكدا دێ بەردەوام بین بۆ رووبرووبوونا مەترسییێن تیرۆرێ و نەهێلانا تیرۆرستان، دێ پێكڤە كاركەین بۆ چەسپاندنا ئاشتی و ئارامی و سەقامگیرییێ.
