وه‌زیرێ ده‌رڤه‌ یێ عیراقێ : هێرشكرن بۆ سه‌ر ئاخا عیراقێ ناهێته‌ قه‌بوولكرن

وه‌زیرێ ده‌رڤه‌ یێ عیراقێ دبێژیت: ناهێته‌ قه‌بوولكرن هێرشى ئاخا عیراقێ بهێته‌كرن و ئاماژه‌ ب هندێ دا، نابیت چ گرۆپ و رێكخراو ئاخا عیراقێ بۆ هێرشكرنێ ل سه‌ر وه‌لاتێن جیران بكاربینن.

ئه‌ڤرۆ حه‌فتى كانوونا ئێكێ یا 2022ێ ل عه‌مانا پایته‌ختێ ئوردنێ، وه‌زیرێ ده‌رڤه‌ یێ عیراقێ فوئاد حسێنى ل دۆر هێرشێن ئیران و توركیا بۆ سه‌ر ئاخا هه‌رێما كوردستانێ دپرێسكۆنفرانسه‌كیدا راگه‌هاند، ئه‌و د دیالۆگا به‌رده‌وامدانه‌ دگه‌ل ئه‌وان وه‌لاتان ب مه‌ره‌ما چاره‌سه‌ركرنا ئاریشه‌یان، و گوت : ئه‌و ئاریشه‌ بۆ رابردووى ڤه‌دگه‌رن، و هنده‌ك ئاریشه‌یێن دیژى‌ وه‌كو هه‌بوونا رێكخراوه‌كا سیاسى ل ئاخا عیراقێ هه‌نه.

فوئاد حسێنى راگه‌هاند، ئه‌و پابه‌ندى ده‌ستوورێ عیراقێنه‌ و ده‌ستوور رێكێ ب چ رێكخراوان ناده‌ت ئاخا عیراقێ بۆ هێرشكرنا سه‌ر وه‌لاتێن جیران بكاربینن، لێ د هه‌مان ده‌مدا قه‌بوول ژى ناكه‌ت هێرشى ئاخا عیراقێ بهێته‌كرن، پێدڤییه‌ ئه‌و ئاریشه‌یه‌ ب رێكا دیالۆگێ بهێنه‌ چاره‌سه‌ركرن.