ب هه‌لكه‌فتا رۆژا جیهانى یا زمانێ دایكێ مه‌سرور بارزانى، سه‌رۆكێ حكومه‌تا هه‌رێمێ په‌یامه‌ك به‌لاڤكر.
ده‌قێ په‌یاما سه‌رۆكێ حكومه‌تێ:
ب هه‌لكه‌فتا رۆژا جیهانى یا زمانێ دایكێ، پیرۆزباهییان ل گشت كوردستانییان ب هه‌موو نه‌ته‌وه و پێكهاتێن وێ ڤه دكه‌م.
زمان ناسنامه و پێناسا هه‌ر مرۆڤ و نه‌ته‌وه‌یه‌كێ یه و پشكه‌كا گرنگ یا كه‌لتوورى یه، بوویه پاراستن و پێشڤه‌برنا زمانێ دایكێ ئه‌ركه‌كێ گرنگ و ده‌ستپێكى یێ خێزان و كۆمه‌لگه‌هـ و ده‌زگه‌هێن حكومه‌تێ یه.
ئه‌گه‌ر گرنگیدان ب زمانێ دایكێ و رێزگرتن ل ڤێ رۆژێ جاره‌كێ بۆ گه‌لێن جیهانێ یا گرنگ بیت، بۆ مه كوردستانییان سه‌ره‌راى شوره‌ش و به‌رگرى و قۆربانیدانا مه‌زن یا گه‌لێ مه، زمانێ مه فاكته‌ره‌كێ گرنگ یێ مانا مه‌یه و پێدڤییه گرنگییه‌كا هه‌ره ده‌ستپێكى یا مه بیت.
هه‌رچه‌نده ل گوره‌ى ده‌ستوورێ عیراقێ زمانێ كوردى زمانه‌كێ فه‌رمى یێ هه‌رێما كوردستانێ و عیراقێ یه، لێ جهێ داخێ یه تا نها ل سه‌ر ئاستێ عیراقێ و هه‌تا هه‌رێما كوردستانێ ژى وه‌كۆ پێدڤى گرنگى پێ نه‌هاتییه‌دان چونكه چاڤێ مه ل پێشڤه‌چوونێن زێده‌تره د ڤى بوارى دا.
داخوازێ ژ هه‌موو دام و ده‌زگه‌هێن ره‌وشه‌نبیرى و زانستى و ئه‌كادمى یێن په‌یوه‌ندیدار یێن هه‌رێمێ دكه‌م كۆ ل ڤى بوارى باشتر ئه‌ركێ خوه بجهـبینن و و هه‌ر كێماسییه‌ك هه‌بیت د بوارێ زمانى و گرنگیدانێ ب زمانى چاره‌سه‌ر بكه‌ن. بۆ ڤێ مه‌ره‌مێ ژى حكومه‌تا هه‌رێما كوردستانێ ئاماده‌یه بۆ هه‌ر هاریكارییه‌ك و هه‌ماهه‌نگییه‌كا پێدڤى د ڤى بوارى دا. بێگومان دگه‌ل گرنگیدانێ ب زمانێ كوردى، پێدڤییه گرنكى ب زمانێ پێكهاتێن دى یێن نه‌ته‌وه‌ى ژى بهێته دان ئه‌وێن كۆ به‌شه‌كن ژ گه‌لێ كورد.
د ڤێ هه‌لكه‌فتا گرنگ دا، ب پێدڤى دزانم ب رێزه‌كا مه‌زن ڤه یادا ئه‌وان مامۆستا و ره‌وشه‌نبیران بكه‌ین یێن كۆ رۆله‌كێ دیار و پیته‌دانه‌كا مه‌زن ب پاراستن و فێركرنا زمانێ كوردى دا هه‌بوویه.
