كۆمسیۆنا مافێن مرۆڤی: نێزیكی پێنج ملیۆن زارۆیێن ئێتیم ل عیراقێ هه‌نه‌

كۆمسیۆنا مافێن مرۆڤی ل عیراقێ دیار كرییه‌: رێژا 25% ێ یا خەلكێ عیراقێ ل ژێر هێلا هەژاریێ دا دژین و پشكەكا مەزن یا وێ هەژاریێ، ژ ئه‌گه‌رێ وان شەر و ئالۆزیانه‌ یێن كو ل عیراقێ رووداین.

هه‌روه‌سا گۆتییه‌: نێزیكی پێنج ملیۆن زارۆیان ژ ئه‌گه‌رێ شەران ئێتیم بووینە كو دبنە 5% ێ ژ رێژا زارۆیێن ئێتیم یێن جیهانێ، هەروەسا پتر ژ 4 ملیۆن خێزانان ژ بەر هەژاریێ زاڕۆیێن خوه‌ ژ قۆتابخانان دەرخستینە و د نوكە دا بۆ دابینكرنا پاریێ ژیارا رۆژانه‌ ل بازاری كار دكەن.

كۆمسیۆنا مافێن مرۆڤی ل عیراقێ ئه‌و ژی ئاشكرا كرییه‌: نێزیكی 45 هزار زارۆك ژ بەركو بابێن وان ئەندامێن رێكخراوا تیرۆرستی یا داعش بووینە، چ ناسنامێن فەرمی نینن.

هه‌روه‌سا دیار كرییه‌ ژی: نوكه‌ 25% ێ یا خەلكێ عیراقێ ل ژێر هێلا هەژاریێ دژین و بێكاری ژی ب رێژا 14% ێ بلند بوویە و كەسێن ئێكێ یێن زیان ڤێ دكەڤن ژی زارۆكن.