وه‌زیرێ ژێده‌رێن ئاڤێ یێ ئیراقێ راگه‌هاند؛ بۆ گۆتۆبێژان ده‌رباره‌ى برینا ئاڤا ئیراقێ ژلایێ ده‌ستهه‌لاتدارێن ئیرانێ، ڤه شانده‌كێ ئیراقى دێ سه‌ره‌دانا ته‌هرانێ كه‌ت.
مه‌هدى ره‌شید حه‌مدانى، وه‌زیرێ ژێده‌رێن ئاڤێ یێ ئیراقێ د پرێس كۆنفرانسه‌كى دا راگه‌هاند؛ ئیرانێ دڤێت دۆسه‌یا ئاڤێ ب رێكه‌فتنا جه‌زائیر یا سالا 1975ێ یا دناڤبه‌را به‌غدا و ته‌هرانێ ڤه گرێده‌ت كۆ پرۆتۆكۆله‌كا ئاڤێ تێدا هه‌یه.
گۆت ژى: وه‌زاره‌تا وى بزاڤ كرینه ئاڤێ ژ رێكه‌فتنا جه‌زائیرێ جودا بكه‌ت كۆ هوربینییێن سیاسى تیدا هه‌نه لێ ئیران یا رژده ل سه‌ر وێ یه‌كێ كۆ ب وێ رێكه‌فتنێ ڤه گرێده‌ت.
ئاماژه ب وێ یه‌كێ ژى دا، ب مه‌به‌ستا گۆتۆبێژێن زێده‌تر و چاره‌سه‌رییا كێشه‌یا ئاڤا به‌نداڤان شانده‌كێ فه‌رمى د چه‌ند رۆژێن بهێت دا دی سه‌ره‌دانا ته‌هرانێ كه‌ت و دگه‌ل به‌رپرسێن وى وه‌لاتى كۆم بیت.
سالانه ب ئه‌گه‌رێ گرتنا ئاڤێ و درۆستكرنا به‌نداڤان ل سه‌ر زیێ بچووك، به‌نداڤێن هه‌رێما كوردستانێ و هه‌ژماره‌كا پارێزگه‌هێن ناڤه‌راستا ئیراقێ رووبروو كێشه‌یا كێم ئاڤییێ دبن، د ئه‌ڤساله ژى دا كارتێكرنێن وی زێده‌تر بووینه و ب رێژه‌یه‌كا به‌رچاڤ به‌ردانا ئاڤێ بۆ رووبارێ دیجله كێم بوویه.
