چ بنگەھین ئەمریکی ل ئیراقێ نامینن

گەرا سیێ یا دیالۆگا ستراتیژی یا ئەمریکی و ئیراقی دەستپێکر و ھەردو ئالی رێککەفتینە کو چ بنگەھێن سەربازی یێن ئەمریکی و بیانی ل ئیراقێ نەمینن و ئالیێ ئیراقی دوپات کرییە کو پاراستنا بارەگەھێن دبلۆماسی ئەرکێ حکومەتا ئیراقێ یە.
قاسم ئەعرەجی، شیرەتکارێ ئاساییشا نشتیمانییا ئیراقێ ئاشکرا کر، شاندێ ئیراقی و ئەمریکی بەحس ل پێشڤەچوونا ھێزێن ئێمناھییا ئیراقێ و پاراستنا ئاساییش و بەرھنگاربوونا تیرۆرێ کرییە، پێشکەفتنەکا باش د دیالۆگێ دا ھەبوو کو سروشت و شێوێ کارکرنا ھەڤپەیمانان ژ ئۆپەراسیۆنان دێ بۆ شیرەتکاری و مەشق و راھێنانێ ھێتە گوھۆرین، بۆ جارا ئێکێ یە ئەو رێککەفتن دھێتە کرن و ئەو یەک دێ بیتە دەلیڤە ئەندامێن دی یێن ھەڤپەیمانیێ ھێزێن خوە ژ ئیراقێ ڤەکێشن.
د بەیانناما ھەڤپشکا ئیراقی ئەمریکی دا ھاتیە، ھەردو ئالییان دوپاتی ل پەیوەندیێن دوقۆلی کرییە، شاندێن ھەردو وەلاتان د وارێن ئاساییش، بەرھنگاربوونا تیرۆرێ، ئابووری، وزە و ژینگەھـ و پرسێن سیاسی گۆتوبێژ کرینە، نوونەرێ حکومەتا ھەرێما کوردستانێ ژی پشکداری وێ دیالۆگێ بوویە.
ل گۆرەی گۆتنا قاسم ئەعرەجی، ئەمریکا سۆز دایە پشکەکا گرنگا ھێزێن خوە ژ ئیراقێ ڤەکێشن ل گۆرەی رێککەفتنا نوو، لژنا تەکنیکی ژی دێ خشتەیەکی بۆ ڤەکێشانا وان ھێزان دانیت.