شارەزایەکێ تەکنەلۆجیایێ وەلاتییان ژ لینکێن خاپینۆك ئاگەهدار دکەت

ل سەردەمەکی کو پلاتفۆرمێن دیجیتالی و تۆڕێن جڤاکی بووینە پشکەکا سەرەکی ژ ژیانا ڕۆژانە یا هەر تاکەکی، تاوانبارێن دیجیتالی و هاککەر بەردەوام ڕێکارێن نوو بۆ فێڵکرنێ ل بکارهێنەران بکار دئینن، دیاردا هنارتنا نامەیێن نەخواستى و درەو ب مەرەما دەستکەفتنا پێزانینێن کەسی گەهشتییە ئاستەکێ مەترسیدار، ب جۆرەکی کو گەلەك کەس ژ بەر کێمییا هشیارییێ بووینە قوربانییێن ڤان جۆرە هێرشان.
د ڤی دەربارەی دا، سەرمەد سەمیر عارف، گەنجێ بەرنیاسێ پارێزگەها دهۆکێ د بیاڤێ تەکنولۆجیا و پلاتفۆرمێن دیجیتالیدا، هۆشدارییەکا توند ددەتە وەلاتییان و بکارهێنەرێن تۆڕێن جڤاکی ل سەر بەلاڤبوونا نامەیێن خاپینۆك.
دەربارەى کا نامەیێن خاپینۆكب چ شێواز دهێن؟ سەرمەد سەمیر ئاماژە ب وێ چەندێ دکەت، ئەڤ هێرشە ب شێوازەکێ فێلبازى و ب ناڤێ خەلاتان بۆ وەلاتییان دهێنە هنارتن، وەك:
(پیرۆزە، تو بوویە خودانێ ترۆمبێلەکێ! یان دەستێ خۆ ل ڤی لینکی بدە دا دیارییا خۆ وەربگری) ناڤبری دووپاتكر، ئەڤ نامەیە بتنێ بۆ داڤ ڤەدانێ نە و مەرەم ژێ دزینا زانیارییێن کەسی و کۆنترۆلکرنا ئەکاونتانە.
ناڤبری ڕوونكر، ب تنێ ئێك کلیكل سەر ڤان جۆرە لینکێن گوماناوی، سیستەمێ پاراستنا ئەلکترۆنی یێ ئامیرێ بکارهێنەری لاواز دکەت و ڕاستەوخۆ دبیتە ئەگەرێ:
–        هاککرن و دزینا پەیج و ئەکاونتێن فەیسبووك، ئینستگرام، تێلگرام و سناپچاتی.
–        دزینا وێنە، ڤیدیۆ و پێزانینێن هەستیار یێن د ناڤ مۆبایلێ دا.
–        بکارئینانا ناڤ و ئەکاونتێ کەسی بۆ فێڵکرنێ ل هەڤال و کەسوکارێن وی.
هەروەسا، سەرمەد سەمیر داخازێ ژ وەلاتییان دکەت، ب چ ڕەنگەکی باوەرییێ ب نامەیێن ب ڤی شێوەیی نەئینن و ڤان ڕێکاران بگرنەبەر:
١.  ب هیچ شێوەیەکی دەستێ خۆ نەدەنە چ لینکێن نەنیاس و گوماناوی.
٢.  چ پێزانین و کۆدێن نهێنی نەدەنە چ کەس و لایەنان.
٣.  پشت ب ناڤەند و پێگەهێن فەرمی ببەستن بۆ هەر خەڵات یان نووچەیەکی.
جهێ ئاماژەپێدانێ یە، سەرمەد سەمیر عارف (ژ دایکبوویێ 2002/1/27 ل دهۆکێ) یە، ژ بەر شارەزاییا خۆ د بوارێ پلاتفۆرمێن دیجیتالیدا و ب کارێن خۆ یێن خۆبەخشانە ل تۆڕێن جڤاکی، بەردەوام ب ڤیدیۆ و پوستێن هشیارییێ هاریکارییا وەلاتییان دکەت بۆ ڤەگێڕانا ئەکاونتێن هاککری و پاراستنا ئاسایشا وان یا دیجیتالی.