عەلی زەیدی: بریارا شەڕی و ئاشتییێ دێ د دەستێ دەولەتێدا بیت

عەلی زەیدی، سەرۆكوەزیرێن عیراقێ د ڕاگەهاندنەكێدا ئاشكراكر، 1ی چریا ئێكێ دەستپێكا قووناغەكا جددییە بۆ چارەسەركرنا بابەتێ چەكێ ژ دەرڤەی كۆنترۆلا دەولەتێ و گوت: حكومەت دێ دەست ب كرینا سیستەمێ بەرگرییا ئاسمانی كەت و قانوونا حەشدا شەعبی ڕێكئێخیت.
عەلی زەیدی د ڕاگەهاندنەكێدا، پیرۆزباهی ل گەلێ عیراقێ كر ب هەلكەڤتا ب دووماهی هاتنا ئەركێ هەڤپەیمانییا نێڤدەولەتی ل عیراقێ و ڤەكێشانا تماما هێزان ب ڕێیێن هشكاتی، ئاسمانی و دەریایی، كو ب دەستكەڤتەكێ نیشتیمانی و سەروەرییا تماما عیراقێ ناڤكر.
سەرۆكوەزیرێن عیراقێ ئاماژە ب وان لایەنان كر یێن دوێ قووناغێ دا مل ب ملێ هێزێن چەكدار ب دژی داعشێ ڕاوەستیاین و دوێ قووناغا دژواردا ڕۆلێ خۆ دیتی.
عەلی زەیدی دیاركر، 1ی چریا ئێكێ یا 2026ێ، دەستپێكەكا جددییە بۆ كۆنترۆلكرنا چەكێ ژ دەرڤەی دەولەتێ و پابەندبوون ب بەندێن دەستووری ل دووڤ نەخشە ڕێیەكا ڕوون، كو 30 خزیرانا 2027ێ دەربازنەكەت، حكومەت دێ ل دووڤ دەستووری كاركەت بۆ ژێستاندنا چەكی ژ هەموو وان گرۆپێن چەكدار یێن كو نەعیراقینە و ل سەر ئاخا عیراقێ دژین، ئەڤەژی بۆ پاراستنا ئاسایش، سەقامگێری و كۆنترۆلكرنا سنوورایە.
زەیدی دووپاتكر، حكومەتا عیراقێ ڕێ نادەت، ئاخا وەلاتێ وێ بۆ چ كاران بهێتە بكارئینان كو ببنە گەف بۆ سەر ئاسایشا وەلاتێن جیران و ڕەت دكەت ئاخا وەلاتێن جیران ژی بۆ هێرشكرنا سەر ئاسایشا عیراقێ بهێتە بكارئینان، حكومەت دێ پشتەڤانییا دامەزراوەیێن ئەمنی كەت بۆ كرینا سیستەمێ بەرگرییا ئاسمانی و ڕێكخستنا قانوونا حەشدا شەعبی وەكو پشكەكا ڤەنەقەتیای ژ سیستەمێ ئەمنییێ وەلاتی، كو ل ژێر فەرمانا فەرماندەیێ گشتییێ هێزێن چەكدار بیت.
هەروەسا سەرۆكوەزیرێن عیراقێ دووپاتكر، عیراقێ قووناغەكا درێژا شەڕی و ڕووبرووبوونا تیرۆرێ دەربازكر و نوكە بەرەڤ قووناغەكا نوو دچیت بۆ بهێزكرنا سەروەرییا نیشتیمانی، سەقامگێری، گەشەپێدانا بەردەوام، باشتركرنا گوزەرانییا وەلاتییان و دابینكرنا خزمەتگوزارییا.