مەسرور بارزانی: ب خۆشحالی ڤە رادگەهینم كو ملیۆن وەلاتی ب رێكا هەژمارا من موچەیی وەردگرن

سەرۆکوەزیرێن هەرێما کوردستانێ دیاركر، د ڤێ حەفتیێ دا ئێك ملیۆن وەڵاتییێن هەرێما کوردستانێ ب ڕێکا “هەژمارا من” موچەیێن خۆ وەردگرن و گۆت، سرایێن درێژ بۆ وەرگرتنا موچەی ب دووماهی هاتن.
ئەڤڕۆ سێشەمبی، 15ـێ ئیلۆنا 2026، مەسرور بارزانی، سەرۆکوەزیرێن هەرێما کوردستانێ، د پەیامەکێ دا ڕاگەهاند: بەری سێ سالان، مە سۆز دا کو ب ڕێکا دەستپێشخەرییا (هەژمارا من) ڤە، دابەشکرنا موچەیێ موچەخۆرێن هەرێما کوردستانێ، ژ شێوازێ پارێ کاش ڤەگوهێزین بۆ بانکێن مۆلەتپێدایی، دلخۆشم کو ڕادگەهینم، ڤێ حەفتیێ ئێك ملیۆن وەڵاتییێن کو د لیستا موچەیێن حکومەتا هەرێمێ دانە، موچەیێن خۆ ب شێوەکێ ئەلکترۆنی و ب ڕێکا بانکێن هەڤپشک وەردگرن، ئەوێن مۆلەتپێدایێن بانکا ناڤەندییا عێراقێ نە.
سەرۆکوەزیرێن هەرێما کوردستانێ گۆت، “هەژمارا من” بنەمایەکێ گرنگ بوو د پابەندبوونا مە دا ب بەرفرەهکرنا گشتگیرییا دارایی، دەستگەهشتن ب قەر و خزمەتگوزارییێن بانکی یێن مۆدێرن بۆ وەڵاتییان ئاسان دکەت و د هەمان دەم دا ئاسانکارییان بۆ حکومەتێ دکەت داكو پارەدانێن ئەلکترۆنی بۆ خزمەتگوزارییێن گشتی بەردەست بکەت.