رێڤەبەرییا پۆلیسێن ئـاکـرێ دیاركر: ئەڤرۆ ل دەمژمێر 9 سپێدێ پۆلیسێن ئـاکرێ ل سنورێ قەزا بەردەرەش هاتنە ئاگەهدارکرن ب هەبوونا تاوانەکا کوشتنێ ل گوندێ بەنێنان یێ سەر ب ناحیا دارەتوو ل قەزا بەردەرەش، هەر زوو مەفرەزێن پۆلیسێن بەردەرەش «بنگەهێ پۆلیسێن پاراستنا چالاکیێن مەدەنی ل بەردەرەش و بنگەهێ پۆلیسێن هەوارهاتنێ ل بەردەرەش و بنگەهێ پۆلیسێن دارەتو » ل جهێ تاوانێ ئامادەبوون و دەست ب ڤەکولینێ کر و ل دویڤ ڤەکولینێن دەستپێکی دیاربوو کو کەسەك ب ناڤێ « هاوار سەعید سالح» یێ ٣٥ سالی، كو ئاکنجیێ گوندێ بەنێنانە ب دەست رێژا گولا هاتە کوشتن سەرا کێشەکا جڤاكی کەڤن یا ( زەڤی و زارا ).
هەروەسا گۆتییە: تەرمێ تاوانلێکری هاتیە رەوانەکرن بۆ نۆشدارییا داد ل پارێزگەها دهوکێ ژبۆ دیاربوونا ئەنجامێن تاوانێ و تومەتبارێ سەرەک یێ ب کوژ ئێکسەر ل دەمێ ئەنجامدانا تاوانێ رەڤییە.
هەروەسا ب فەرمانا دادوەرێ ڤەکۆلینا بەردەرەش و لدویف بەندێ « ٤٠٦ ی.س » فەرمانا گرتنێ بۆ تومەتبارێ سەرەکی دەرکەفتیە و (٣) تومەتبار هاتینە دەستەسەرکرن و دۆز بۆ تاوانێ هاتیە ڤەکرن ل بنگەهێ پۆلیسێن نەخۆشخانا بەردەرەش، رەوش هاتیە کونترۆل کرن ژلایێ پۆلیسێن ئاکرێ و بەردەرەش و هێزێن ئاسایشێ و زێرەڤانی و ڤەکۆلین یا بەردەوامە.
