موچەیێ نوو یێ خانەنشینییا کرێکارێن کەرتێ تایبەت هاتە دیارکرن

وەزارەتا دارایی و ئابوورییا حکومەتا هەرێما کوردستانێ ڕێنمایەکا نوو بۆ دیارکرنا کێمترین موچەیێ خانەنشینییا کرێکارێن کەرتێ تایبەت دەرخست و ب 500 هزار دیناران جهگیر کرن.
ل دویف ڕێنماییا ژمارە شەش یا سالا 2026 یا وەزارەتا دارایی و ئابووری، کو ئیمزایا ئاوات جەناب نوری، وەزیرێ دارایی لسەرە، بڕیار هاتە دان کێمترین موچەیێ هەیڤانە یێ خانەنشینیێ بۆ کرێکارێن کەرتێ تایبەت ب رێژا 500 هزار دینارێن عێراقی بهێتە دیارکرن.
وەزارەتا دارایی گۆت ژی، کو ل دویف یاسایا خانەنشینی و دەستەبەرییا جڤاكی، ئەو کەسێن شایستەیێ ڤی موچەی بن دڤێت هندەک مەرج لسەر وان بجهـ ببن” بۆ خانەنشینیێ ب رێکا ژی و خزمەتێ، پێدڤییە زەلام د ژییێ 60 سالیێ و ژن د ژییێ 55 سالیێ تەمام کربن، هەروەسا ژ کێمتر 20 سالێن خزمەتا دەستەبەرکری هەبن. یان ژ بۆ زەلامی 30 سال و بۆ ژنێ 25 سالێن خزمەتا دەستەبەرکری هەبن بێ گوهدانە عەمری.
هەروەسا ئەو کرێکارێ ب رێژا 100% تووشی نەخۆشییا پیشەیی دبیت ل دۆر راپۆرتا لژنا نۆشداری، یان ب سەدەما برینداربوونا کاری تووشی پەککەفتنا تەمام ببیت یان گیانێ خۆ ژ دەست ددەت، شایستەیی ڤی موچەی دبیت. هەروەسا ئەگەر کرێکار د دەمێ خزمەتێ دا گیانێ خۆ ژ دەست بدەت و ناڤێ وی د تۆمارێن دەستەبەرییا جڤاكی دا هەبیت، میراتگرێن وی دێ موچەیێ خانەنشینییێ یێ تەمام وەرگرن.