<h2 style="text-align: right;">سەرۆكوەزیرێن هەرێما كوردستانێ ل سالیادا داگیركرنا شنگالێ و جینۆسایدكرنا كوردێن ئێزدی داخواز دكەت، حكومەتا فیدرال ئەرك و بەرپرسیارەتییا خۆ بجهبینیت و كوردێن ئێزدی قەرەبوو بكەت. مەسرور بارزانی، د پەیاما خۆدا ڕاگەهاند، حكومەتا هەرێما كوردستانێ ل سەر بزاڤێن خۆ و كاركرن بۆ ئازادكرن و ڤەگەراندنا هەموو ئەوان ڕەڤاندییان یێن هەتا نوكە نەهاتینە ئازادكرن، یا بەردەوامە. هەروەسا دیاركر، ئەو دێ بەردەوامییێ ب پشتەڤانییا دارایی بۆ ڕزگاربوویان و هاریكاریكرنا وان خووشك و برایێن ئێزدی دەن، یێن ژبەر نەئاسایبوونا ڕەوشا شنگالێ و دەوروبەرێن وێ، هێشتا ل كەمپان دژین و نەشیاین ڤەگەرنە جهێن خۆ. سەرۆكوەزیرێن هەرێما كوردستانێ ئاشكراكر، ئەو جارەكا دی دووپات دكەن كو دڤێت حكومەتا فیدرال ئەرك و بەرپرسیارەتییێن خۆ بجهبینیت، خووشك و برایێن ئێزدی قەرەبوو بكەت و هاریكارییا ئاوارەیان بكەت، ڕێ بۆ وان خۆش بكەت داكو ب سەر بلندی ڤەگەرنە جهێن خۆ، ئەوژی ب ڕێیا بجهئینانا ڕێككەڤتنا شنگالێ، دەرخستنا هێزێن چەكدار و میلیشیان ل دەڤەرێ و ڤەگەریانا ئاشتی و ئاسایشێ بۆ دەڤەرێ.</h2>
