سه‌رۆك بارزانی د چاڤپێكه‌فتنه‌كێ دا ل گه‌ل رادیویا ” مۆنتى كارلۆ” راگه‌هاند: جهێ داخێ یه هه‌می بڕیارێن دادگه‌ها فیدرالی دژی هه‌رێما كوردستانێ نه، ب ته‌مامی لایه‌نگره و دژی هه‌رێما كوردستانێ یه، ئه‌و دادگه‌هه نه یا ده‌ستووری یه، به‌لكو ل سه‌ر ده‌مێ برێمه‌ر هاتیه پێكئینان، نوكه ب رۆلێ ده‌ستهه‌لاتا دادوه‌ری و ده‌ستهه‌لاتا یاسادانان و ده‌ستهه‌لاتا جێبه‌جێكرنێ رادبیت.
سه‌رۆك بارزانی به‌حسێ پشکداریكرنا پارتی د كابینا سوودانی دا دكه‌ت و دبێژیت: پشكداریا مە د کابینەیا سوودانی دا ل سەر بنەمایێ رێککەفتنەکا سیاسی بوو و هەڤپەیمانیا برێڤەبرنا دەولەتێ ل سەر بنەمایێ ڤێ رێککەفتنێ هاتبوو پێکئینان، یا مە دیتی ئەوە کو بەرێز سوودانی دڤێت وێ رێککەفتنا د ناڤبەرا ئالیێن سیاسی دا هاتیەکرن، بجهبینیت، لێ د هەمان دەم دا ئەم دبینین کو ئاستەنگی د کەڤنە د رێکا وی دا، مە پشتەڤانیا وی کریە و دێ کەین ژی ژ پێخەمت بشێت وێ رێککەفتنێ بجهبینیت، لێ بەرهنگاری ئاستەنگیێن مەزن دبیت، ئەو ئاستەنگی رێگریێ لێ دکەن داکو ئەو رێککەفتنە نەهێتە بجهئینان.
ل دۆر ره‌وشا ئیراقێ سه‌رۆك بارزانی گۆت: ئەگەر ئیراقێ ئەوا رێککەفتن ل سە هاتیەکرن بجهئینا و ڤەگەریا دیمۆکراسیێ و بنەمایێن سەرەکی یێن هەڤپشک یێن رێککەفتن و هەڤسەنگیێ، ل وی دەمی دبیت ئیراق ژ ڤێ رەوشی بهێتە رزگارکرن، لێ بەروڤاژی پەنابرن بۆ دەستهەلاتا تاکئالیانە و دەستبسەرداگرتنا هەمی تشتان ژ ئالیێ گرۆپەک یان کیانەک یان پێکهاتەیەکێ دەستنیشانکری ڤە، ئیراق دێ بەرەڤ ژناڤچوونێ چیت.
