وەزیرێ پەروەردێ دو سیستەمێن دی یێن ئەلكترۆنی بۆ گەشەپێدانا شییانێن مامۆستا و قوتابیان راگەهاند

ئەڤرۆ ئێكشەممە، 25 ی شواتا 2024 ێ، ئالان حەمە سەعید، وەزیرێ پەروەردێ یێ حكومەتا هەرێما كوردستانێ، دو پلاتفۆرمێن نوو یێن دیجیتالی “ئی ڕاهێنان و ئی كتێبخانە”ی راگەهاند، كو ب هەردو شێوەزارێن سۆرانی و بادینی بەردەستن.

وەزیرێ پەروەردێ به‌حسێ سیستەمێن دیجیتالكرنا داتایێن وەزارەتا پەروەردێ و ناڤەندێن خواندنێ كر، پێشتر ب رێیا “ئی پەروەردە و ئی وانە”، داتایێن قوتابی و مامۆستا و بەلگەنامێن وان هاتینه‌ تۆمار كرن.

ل ده‌مێ راگەهاندنا “ئی ڕاهێنان و ئی كتێبخانە”، وەزیرێ پەروەردێ گۆت: “600 راهێنەر كو بۆ ده‌مێ 40 ده‌مژمێران هاتینه‌ راهێنان، دڤێت حەفتییانە بچنە قوتابخانان و وانا بێژنه‌ مامۆستایان، هەر مامۆستایەك سالانە دێ 60 وانەیێن ڕاهێنانێن جۆدا وەرگریت.”

گۆت ژی: “گشتاندنه‌ك بۆ مامۆستایان دێ هێته‌ كرن، هەر مامۆستایەكێ پتر په‌رتووكان بخوینیت، د ئەنجامدا مامۆستایێ ئێكێ دێ خەلاته‌كێ 5 ملیۆن دیناری و مامۆستایێ دووێ 4 ملیۆن دینار و مامۆستایێ سێیێ 3 ملیۆن دیناران هێنه‌ خه‌لات كرن.