سه‌رۆكێ ئێكه‌تییا سه‌ندیكا كرێكارێن كوردستانێ لقێ دهۆكێ راگه‌هاند، به‌هرا پتر یا جهێن كاركرنێ ل دهۆكێ پێگیرییێ ب رێنمایێن وه‌زاره‌تا كار و كاروبارێن جڤاكى ناكه‌ن، ئێدى هه‌ر پرۆژه‌یه‌كێ پێگیرییێ نه‌كه‌ت، دێ كه‌ڤیته به‌ر سزایێن قانوونى.
وه‌لات ئه‌مین ئۆزمانى سه‌رۆكێ ئێكه‌تییا سه‌ندیكا كرێكارێن كوردستانێ لقێ دهۆكێ ل دۆر بریارا وه‌زاره‌تا كار و كاروبارێن جڤاكى یا كو دڤێت كرێكارێن كۆمپانى و جهێن كاركرنێ ب رێژه‌یا 75%ێ كوردبن، بۆ ئاژانسا خانى دیاركر، نێزیكى 90 هزار جهێن كاركرنێ ل دهۆكێ هه‌نه، لێ به‌هرا پتر یا وان جهان پێگیرییێ ب رێنمایێن وه‌زاره‌تا كار و كاروبارێن جڤاكى ناكه‌ن و هه‌تا 50%ێ ژى كرێكارێن وان د بیانینه، لێ ئێدى هه‌ر جهه‌كێ پێگرییێ نه‌كه‌ت دێ هێته سزادان.
گوت ژى : ئه‌ڤ بریاره هه‌موو پرۆژه‌یێن كاركرنێ بخۆڤه دگرت، چ كۆمپانى بن یان پرۆژه‌یێن بچووك بن، هه‌روه‌سا هه‌موو پرۆژه‌یێن ده‌ستوورییا كاركرنێ هه‌بیت یان ژى نه، دڤێت پێگیرییێ ب ڤێ بریارێ بكه‌ن، لژنه‌یێن وان دێ ژ سوبه‌هى وێڤه ل هه‌ردوو ده‌مێن سپێدێ و ئێڤارییان ده‌ست ب سه‌ره‌دانێن خوه كه‌ن، هه‌ر پرۆژه‌یه‌كێ كاركرنێ یێ كو كرێكارێن وى ب رێژه‌یا 75%ێ كورد نه‌بن، دێ هێته سزادان.
