سه‌رۆككۆمارێ عیراقێ : پاشخستنا په‌سه‌ندكرنا بودجه‌ى دێ رێگرییێ ل كار و چالاكییێن حكومه‌تێ كه‌ت

سه‌رۆككۆمارێ عیراقێ راگه‌هاند، پێدڤییه‌ ئه‌ندامێن جڤاتا نوونه‌ران بریاره‌كا روون و دووماهییێ سه‌باره‌ت په‌سه‌ندكرنا پرۆژه‌قانوونا بودجه‌ى بده‌ن.

له‌تیف ره‌شید سه‌رۆككۆمارێ عیراقێ دیاركر، خه‌لك ب گرنگیڤه‌ چاڤدێرییا په‌سه‌ندكرنا پرۆژه‌قانوونا بودجه‌ى دكه‌ت، وه‌كو پێنگاڤه‌كا گرنگ بۆ دابینكرنا پێدڤییێن بیناسازى و بنیاتدانانا وه‌لاتى و ده‌ستپێكرن و بجهئینان و پێشڤه‌برنا و تمامكرنا خزمه‌تگوزارییێن پێدڤى ژلایێ باژێر و پارێزگه‌هێن جۆداڤه‌.

ئاماژه‌ ب هندێ ژى كر، كۆمبوونا سوبه‌هى یا په‌رله‌مانێ عیراقێ دێ بۆ په‌سه‌ندكرنا بودجه‌ى هێته‌ رێكخستن.

گوت ژى : ئه‌و سوپاسییا بزاڤێن جڤاتا وه‌زیران و جڤاتا نوونه‌ران دكه‌ن بۆ هاڤێتنا پێنگاڤان به‌ره‌ڤ تمامكرنا په‌سه‌ندكرنا پرۆژه‌قانوونا بودجه‌ى، هه‌ر پاشخستنه‌ك دێ رێگرییێ ل كار و چالاكییێن حكومه‌تێ كه‌ت و زیانێ ب پێدڤییێن وه‌لاتییان گه‌هینیت.

 ئه‌وژى هاتییه‌، ئه‌و چاڤه‌رێى بریاره‌كا روون و دووماهییێ ژلایێ ئه‌ندامێن جڤاتا نوونه‌رانڤه‌ سه‌باره‌ت په‌سه‌ندكرنا بودجه‌ی بۆ بجهئینانا به‌رپرسیاره‌تییێ و ئه‌ركێن سه‌ره‌كى یێن كو پێدڤییه‌ بهێنه‌ بجهئینان دكه‌ن، ب شێوه‌یه‌كى دگه‌ل پێدڤییێن خه‌لكى بیت و ئاستێ ژیان و خزمه‌تگوزارییێ بلند بكه‌ت.