چنار سه‌عه‌د عه‌بدولا : ته‌عریبكرنا ده‌ڤه‌رێن كوردستانێ هه‌تا نوكه‌ ژى یا به‌رده‌وامه‌

ئه‌ندامه‌كا كۆمیته‌یا ناڤه‌ندا پارتى دیموكراتى كوردستان د په‌راوێزا پشكدارییا خوه‌ دا ل فێستیڤالا ئێكێ یا ره‌وشه‌نبیرییا شیخان راگه‌هاند، پرۆسه‌یا ته‌عریبكرنا ده‌ڤه‌رێن كوردستانێ یێن ژ ده‌رڤه‌ى سنۆرێ ئیداره‌یا هه‌رێما كوردستانێ هه‌تا نوكه‌ژى یا به‌رده‌وامه‌.

چنار سه‌عه‌د عه‌بدولا ئه‌نداما كۆمیته‌یا ناڤه‌ندا پارتى و به‌رپرسا پشكا خواندن و پێگه‌هاندنا پارتى دیموكراتى كوردستان گوت: سه‌ربارى هه‌بوونا ته‌عریبكرنێ ل ده‌ڤه‌رێن كوردستان یێن ژ ده‌رڤه‌ى سنۆرێ ئیداره‌یا هه‌رێما كوردستانێ، ئاریشه‌یا مه‌زهه‌بێن جۆدا ژى ل وان ده‌ڤه‌ران هه‌یه‌.

هه‌روه‌سا دیاركر، مه‌زهه‌بێ بالا ده‌ست دڤێت مه‌زبه‌هێن دى دناڤ خۆدا به‌رزه‌بكه‌ت، هه‌روه‌سا ئاریشه‌ د رێكخستنا سیاسه‌تا حكومرانییێدا هه‌یه‌، ده‌ستوورى ئه‌ڤى وه‌لاتى چاره‌سه‌رییا بابه‌تێ پێكڤه‌ژیانێ ناكه‌ت، ژبه‌ركو هه‌تا نوكه‌ ده‌ستووره‌كێ مه‌ده‌نى نه‌بوویه‌ كو نه‌بیته‌ گه‌ف ل سه‌ر پێكهاته‌یان.